Los llectores d’Asturies.com creen que los resultaos de les eleiciones nun son bonos pal país

Casi la metá de los usuarios d’Asturies.com, el 48 por cientu, piensen que los resultaos de les eleiciones del 22 de mayu nun son bonos pal país. FAC foi’l ganador de les nacionales y ye posible que paute’l Gobiernu d’Asturies col PP.
 
El partíu de Francisco Álvarez-Cascos algamó 16 escaños, ún más que’l PSOE pese a que la formación lliderada por Javier Fernández foi la más votada. Mentes, el PP baxó hasta los 10 escaños y Izquierda Xunida, nesta ocasión namái con Los Verdes d’Asturies de la mano, mantién los 4. Unos resultaos que, pa la mayor parte de los llectores que votaron nel nuesu ‘Conceyu Abiertu’ nun son bonos pal país, anque un 27 por cientu manifiesta lo contrario.
 
Por último, un 25 por cientu de los usuarios d’Asturies.com escoyeron la opción ‘Nun sé dicite’ y prefieren esperar acontecimientos. Mañana, en ‘Conceyu Abiertu’, vamos a espublizar una encuesta nueva na qu’esperamos tener la so opinión.