Bloque por Asturies-UNA refuga “l’espoliu de la casona de Piñole”

La venta d’una casa mariñana de Nicanor Piñole propiedá del Conceyu de Xixón pa mercar cuadros del artista foi criticada pol Bloque-UNA y los vecinos de Cabueñes. “Ye como vender un coche pa mercar llueu la gasolina”, asegura Roberto Colunga.
 
La operación que pretende l’Ayuntamientu, cola aceptación de la comisión que vela polos intereses del pintor xixonés y los descendientes d’Enriqueta Ceñal –viuda del artista, yá finada–, ye la d’entamar una puya pola parcela onde ta la casa mariñana de Piñole –que lleva’l nome de ‘El Llosu d’Arriba’– y una panera, tasada nunos 600.000 euros. D’esta forma, el Conceyu quier ingresar unes perres pa llueu poder mercar obres del artista que salgan a la venta en feches próximes, yá que consideren qu’esta casa donada pola viuda de Piñole al Ayuntamientu nel 1994 cola condición de que se-y diera un usu museísticu, nun reúne condiciones “pa facela visitable”, como apuntó’l conceyal d’Educación y Cultura, Justo Vilabrille.
 
Roberto Colunga, candidato a la Alcaldía de Xixón de Bloque por Asturies-Unidá Nacionalista Asturiana (UNA) nes eleiciones municipales pasaes, criticó que’l conceyal en funciones tea actuando políticamente pa llograr un oxetivu nidiu: subastar el patrimoniu públicu del conceyu. La formación nacionalista recordó que “el propiu Conceyu, a petición de l’Asociación de Vecinos de Cabueñes-La Pontica, yá
entamó actuaciones de tipu museísticu na casona qu’incluyíen monitores y talleres dientro de les actividaes de branu del coleutivu vecinal”, polo que nun consideren “creíble que nun pueda facerse por parte del Ayuntamientu actividaes que sí pudo organizar nel so día por iniciativa d’una asociación de vecinos”.
 
D’igual forma, Colunga señala que si güei la situación ye incompatible con un usu museísticu “ye pol abandonu d’estos años últimos”, actuación que, na so opinión, dende’l Conceyu quier utilizase como “escusa pa vender esti patrimoniu”. Pa ello, fai referencia a “les prieses y formes coles que Justo Vilabrille ta xestionando l’asuntu”. Bloque-UNA tamién considera grave enforma que “una casa incluyida nel Catálogu Urbanísticu de Xixón nun se mantenga dientro del patrimoniu públicu”, al ser una garantía pa la so conservación.