El PSOE nun ta d’alcuerdu cola propuesta de repartu de FAC de la Mesa de la Xunta Xeneral

Jesús Gutiérrez, secretariu d’Organización del PSOE, nun cree razonable que’l Gobiernu posible de Francisco Álvarez-Cascos tenga’l control de la Mesa de la Xunta Xeneral. “Y menos al traviés d’un grupu parllamentariu de 16 diputaos”, resaltó.
 
El ‘socialista’, que señaló que la Xunta Xeneral ta encargada de dirixir y controlar l’aición del Gobiernu, refugó asina la propuesta de la Comisión Direutiva de Foro Asturias Ciudadano (FAC) d’ufiertar a toles fuercies con representación unes bases pa un alcuerdu sobre los miembros de les instancias teniendo en cuenta'l panorama políticu nuevu tres les eleiciones. Ésta señalaba qu'a Foro Asturias (16 diputaos) correspondería-y la presidencia y vicepresidencia primera de la Mesa de la Xunta Xeneral; al PSOE y a IU (15 y 4 diputaos), la vicepresidencia segunda y la secretaría segunda; y al PP (10 diputaos), la secretaría primera.
 
Gutiérrez señaló que’l so partíu ta centráu nestos momentos na preparación de los plenos municipales que van escoyer a los alcaldes esti sábadu, día 11, y que nun va ser hasta primeros de la selmana próxima cuando fixe la so posición al respeuto de la composición de la Xunta y de los organismos y instituciones dependientes. “Hasta esi momentu, la FSA-PSOE nun va realizar nengún comentariu”, señaló.
 
Otra manera, el secretariu d’Organización de la formación lliderada por Javier Fernández criticó l’actitú d’Álvarez-Cascos al señalar qu’había un pautu ente’l PSOE y el PP pa que continuara Gabino de Lorenzo como alcalde d’Uviéu. La dimisión de Paloma Sainz, candidata ‘socialista’ a la Casa Conceyu uviedina, fixo sospechar al ex ministru de Fomentu d’ello. “La prueba más evidente de que nun esiste nengún acuerdu ente'l PSOE y el PP ye la decisión espresada por Javier Fernández y apoyada polos socialistes asturianos de nun presentar candidatura a la presidencia d'Asturies”, retrucó Gutiérrez, qu’añadió que, de ser real esi pautu, “Javier Fernández sería presidente”.