El primer bonitu de la temporada vendióse a 56,87 euros el quilu, un récor históricu

La rula d’Avilés vendió esta mañana’l primer bonitu de la temporada a un preciu de 56,87 euros el quilu, lo que supón un récor históricu. La cadena de supermercaos Alimerka fixóse cola totalidá del pescáu descargáu.
 
La venta del primer bonitu nun tardó en facese efeutiva, yá que “n’apenes cinco minutos” tol pescáu taba colocáu, según informó Ramón Álvarez, xerente de la rula d’Avilés. Alimerka, al igual que n’otres ocasiones, adquirió la totalidá de la pesca descargada del Esmeralda III y el Nuevo Chisco, que rondó los 1.200 quilogramos. Esta cantidá, escasa, débese a que namái estes dos embarcaciones participaron na rula y a que tovía “ye pronto”, yá que la primer venta del añu pasáu fixóse a mediaos de mes.
 
Nel 2010, el bonitu vendióse a poco más de 45 euros el quilo, “que yá foi un récor”, recuerda Álvarez. Nesta ocasión, les pieces de tamañu mayor, que supunxeron 700 tonelaes, compráronse a 56,87 euros el quilu, mentes que les otres casi 500, de los bonitos más pequeños, tasáronse en 14,54 euros el quilu.
 
Álvarez apuntó que nun sabe cuándo va producise otra venta de bonitu na rula avilesina, que cada año inaugura la temporada asturiana. La razón ye que tovía son poques les embarcaciones que tán faenando.