Spanta la Xente presentó’l so segundu discu, ‘Alienda’

El grupu ḷḷenizu Spanta la Xente presentó esti xueves el so segundu discu, que lleva por nome ‘Alienda’. Esti sábadu, a les 19.30 hores, la banda va ufrir un conciertu nel Teatru Vital Aza de La Pola Ḷḷena nel que va dar a conocer los cantares nuevos.
 
Spanta la Xente sigue apostando en ‘Alienda’ pola so mecigaya de rock y folk. Nesti segundu trabayu d’estudiu –terceru si contamos la maqueta–, los de Ḷḷena ufierten once temes, unos con más enclín folk, como 'Nos fondos hai carbón' o 'El Sonḷḷaín', y otros rockeros, como 'Güestia' o 'La variante II: puerta d'atrás'. Los orixes mineros de la banda vense reflexaos en munches de les lletres d'esti trabayu.
 
No instrumental, Saúl Quiñones (gaiteru), Rubén Fernández (guitarra) y Xulio Fernández (pianu y tecláu) –los trés tuvieron na presentación en compañía de Chus Pedro, responsable de la discográfica La Mula Torda–, son los únicos que permanecen de los ocho miembros orixinales, si bien Xuanín (batería) y Tinto (vocalista) entraron poco depués. Natalia (violín) y Pablo (bouzouki) son les novedaes principales que presenta'l trabayu, amás de les munches collaboraciones, ente elles les bandes de gaites Llariegu y Güestia, y el coru La Flor, de La Pola Ḷḷena.
 
Chus Pedro entamó la presentación esplicando que conoció a Spanta La Xente nuna nueche de San Xuna na que compartió escenariu con ellos. Presentó-yoslos l'escritor Dolfu Camilu y decidió apadrinalos. “Ye una satisfaición ver a xente tan moza trabayar tan profesionalmente, y ver que yá puen dir solos a tocar a les romeríes”, bromiaba l’ex vocalista de Nuberu mientres la rueda prensa. Pela so parte, Quiñones señaló que la formación sigue la so llinia orixinal del so entamu anque destacó qu’agora “tenemos más esperiencia y tamos más rodaos”.