Álvarez-Cascos entama con Fernández un ciclu de reuniones colos llíderes d’otres fuercies

Francisco Álvarez-Cascos y Javier Fernández, candidatu del PSOE, aconceyáronse per más d’una hora, anque nun entraron en negociaciones. “Foi una primer toma de contautu”, señaló’l llíder de FAC que’l miércoles va vese con Pérez-Espinosa.
 
“Nun yera una reunión de negociación”, señaló Álvarez-Cascos, que mostró la disposición de la so formación de llograr, “al traviés del diálogu, pautos parllamentarios, de llexislatura y de Gobiernu”. “Foro Asturias tien independencia completa y marxe d’actuación pa desarrollar conversaciones y, nel so caso, actuaciones nos trés ámbitos”, continuó l’ex ministru de Fomentu, que recordó qu’esa idea yá la manifestó na nueche eleutoral.
 
Na rueda de prensa posterior al aconceyamientu col llíder del PSOE, insistió en que nun será hasta que termine la ronda de contautos con toles formaciones polítiques cuando “valore y haga declaraciones que puedan interpretase como propuestes d’alcuerdu”, yá que, na so opinión, éstes han de surdir del diálogu “con toos”. Tamién señaló que, na reunión, espuso a Fernández la idea de que la situación xeneral d’Asturies y del Estáu fai que, perriba de les circunstancies eleutorales de FAC, se coloque la situación de crisis y d’ehí que nel so planteamientu se tenga en cuenta la “disponibilidá ensin restricciones al diálogu más ampliu orientáu a la posibilidá d’algamar pautos”.
 
Nesi sen, esplicó que pueden tratase de pautos parllamentarios, que tengan la Xunta Xeneral como marcu de referencia, pautos de llexislatura que tengan árees concretes susceptibles d’algamar consensos n’interés d’Asturias o pautos de gobiernu qu’implicaríen non solo coincidencies nel terrén de programes, sinón tamién collaboraciones nel ámbitu de participación nel Gobiernu. Asina destacó qu’estos tres pautos “son posibilidaees que pueden alministrase y nengún ye incompatible col otru”. D’igual forma, Álvarez-Cascos agradeció’l “compromiso de llealtá institucional” que-y treslladó Fernández y destacó que lo natural ye qu’ésti tenga continuidá nel tiempu.
 
Pela so parte, el candidatu del PSOE señaló que l’aconceyamientu foi una reunión “cordial nel marcu de llealtá institucional” y destacó que se trató d’un alcuentru “normal” na ronda de contautos que la fuerza que tuvo más escaños ha d’aniciar col restu de fuercies. Fernández tamién apuntó que na reunión trataron “asuntos xenerales respeuto a la percepción que caúna de les fuercies tien del Principáu y de los escenarios que se planteen nel marcu de constitución de la Xunta Xeneral del Principáu”.
 
Otra manera, Álvarez-Cascos va siguir la so ronda de contautos mañana cola llíder del PP, Isabel Pérez-Espinosa. Mentes, el xueves, va ser el turnu de Jesús Iglesias, candidatu d’Izquierda Xunida-Los Verdes d’Asturies.