Paloma Sainz nun va garrar el so acta de conceyal polos resultaos malos del PSOE n’Uviéu

La candidata del PSOE a l’alcaldía d’Uviéu, Paloma Sainz, anunció que nun va garrar l’acta de conceyal polos resultaos del partíu nes eleiciones del 22 de mayu. Los ‘socialistes’ sumaron 6 conceyales, por 11 del PP, 7 de FAC y 3 d’IX-LV.
 
“Esta ciudá quinxo que la derecha siga gobernando. Tengo qu’asumir esi fallu”, señaló Sainz p’argumentar la so decisión. La candidata del PSOE a l’alcaldía afirmó que teníala tomada tres conocer los resultados eleutorales, nos que los ‘socialistes’ perdieron tres conceyales, anque decidió facelo públicu depués de comunicalo a l’Agrupación Municipal Socialista d’Uviéu (AMSO). D’igual forma, quier que la so decisión se entienda como una “contribución” pa “consolidar un lideralgu” baxo la direición del secretariu xeneral de l’AMSO, Alfredo Carreño, persona q’acompañó a Sainz na rueda de prensa y que va ser el voceru del PSOE na Casa Conceyu.
 
Carreño aseguró que respeta la decisión de Sainz y qu’agradece’l so trabayu: “Toos tenemos qu’asumir responsabilidaes”, apuntó. Sobre la postura del partíu en relación cola investidura del alcalde próximu de la ciudá, afirmó que’l so partíu va abstenese y que ye a PP y a Foro Asturias a quienes correspuende ponese d’alcuerdu. “Cascos y Gabino de Lorenzo son lo mesmo”, señaló.
 
Otra manera, José Manuel Cuervo, senador y númberu 1 de la llista del PSOE en Cangas del Narcea, tomó’l vienres pasáu la mesma decisión que Sainz. Nel conceyu occidental, el PSOE ganó 4 conceyales, polos 6 d’IX-LV, los 5 del PP y los 2 de FAC.