Les acampaes d’indignaos convoquen una marcha al Centru Niemeyer pal domingu

Una marcha ente la plaza El Parche y el Centru Niemeyer ye la iniciativa nueva de les acampaes d’indignaos que permanencen nes places principales de les ciudaes asturianes. Esta cita pretende convocar a miles de persones n’Avilés.
 
La manifestación ta prevista pa les 18 hores y tien como destín final el Niemeyer. Nella van participar indignaos procedentes de les acampaes de Xixón, Uviéu, Mieres y Llangréu, y un bon númberu de ciudadanos xunto colos avilesinos que formen parte del movimientu que tuvo’l so ainiciu’l 15 de mayu. La marcha convócase baxo’l mesmu lema que nesa fecha yá histórica: “Toma la cai. Nun somos mercancía nes manes de políticos y banqueros”.
 
Otra manera, les movilizaciones ciudadanes que vienen repitiéndose en toles ciudaes del Estáu español tán teniendo reflexu en otros estaos. Asina, ayeri axuntáronse n’Atenes 40.000 persones pa mostrar la so indignación contra los políticos y banqueros. Mentes, en Paris, cientos de persones quixeron convertir la Place de la Bastille na Puerta del Sol y la policía francesa empleóse a fondu pa desallugar a les persones ehí concentraes.