Kosovo: un añu d’independencia a medies

El 17 de febreru de 2008 Kosovo, el territoriu balcánicu qu’hasta esa fecha taba baxo la soberanía formal anque non de facto de Serbia, declaraba unilateralmente la so independencia. Un añu depúes el país sigue baxo tutela internacional y reconocíu por 54 estaos en tol mundu como EE.UU, Francia o Alemaña, mientres  qu’España o Rusia niéguense a reconocer el nuevu status. Los kosovares viven anguaño una "independencia a medies".

Esti aniversariu vien precedíu d’una resolución del parlamentu européu aprobada la selmana pasada na que s’afala a la UE a ufrir sofitu económicu y políticu a les autoridaes kosovares pal desarrollu d’un Kosovo “multiétnicu”, pidiendo amás a estaos como l’español que reconozan la independencia del territoriu. Sicasí, tres conocer esta resolución, dende gobiernu español al traviés del ministru d'Asuntos Esteriores, Miguel Angel Moratinos, conseñó que dende les autoridaes españoles "respetamos la decisión del parlamentu européu, pero non la compartimos", pola que l'estáu español va siguir ensin reconocer el nuevu estáu kosovar.  

Desde 1999 ye la ONU la qu’alministra’l territoriu tres la intervención de la OTAN contra Serbia polos episodios de llimpieza étnica contra los kosovares d’orixe albanés (88% de la población) fechos baxo les órdenes del presidente serbiu Slobodan Milosevic, responsable tamién d’episodios asemeyaos n’otros territorios de l’antigua Yugoslavia, principalmente en Bosnia. Dende esi momentu Serbia, anque conservó formalmente la soberanía sobre Kosovo, perdióla de facto, anque anguaño sigue considerándola una provincia mas de Serbía, non reconociendo la so independencia y denunciando amás episodios de violencia étnica contra la minoría serbia (8% de la población), qu’en parte foi abandonando’l territoriu pola tensión étnica ente dambes comunidaes.

Otra fitu nel camín hacia la independencia asocedió en febreru de 2007, cuando la ONU asoleyó un plan sobre l'estatutu políticu de Kosovo que-y daba una amplia autonomía baxo control internacional, abriendo’l camín a la independencia. Esi mesmu añu, pero en payares, Hasim Thaçi, ex-guerrilleru del grupu armáu independentista UÇK y agora xefe del Partíu Democráticu de Kosovo, ganó les elecciones cola promesa de la independencia. Darréu  afaló al parlamentu kosovar a declarase independiente, güei fai un añu.

Dende entós esti territoriu bálcanicu sigue baxo control internacional y ensin desarrollar un poder real dende les instituciones propies. Y ye que la falta de reconocimientu internacional pola mayoría de los estaos, ente ellos España o Rusia, tradicional aliada de Serbia, ta torgando en parte’l desendolcu d’una alministración kosovar independiente dafechu de la Misión d’Alministración Provisional de les Naciones Unides en Kosovo (MINUK). Anque la mayor parte de los estaos de la UE como Francia, Alemaña, Italia o‘l Reinu Uníu amás de los EE.UU, Canadá o Australia ente otros, reconocen el nuevu estatus, entá queden mas d’un cientu d’estaos por asumila. Por eso güei, en Pristina, capital kosovar, tan celebrando una independencia “a medies”.