Tuenda actúa esti sábadu en Martimporra y Toli Morilla, na FNAC

La música n’asturianu tien dos cites pa esti sábadu. En Martimporra, Tuenda va ufrir los temes del so tercer trabayu ‘Tuenda 3’, mentes que na FNAC Toli Morilla va presentar la segunda edición del so discu de versiones de Bob Dylan.
 
El conciertu de Bimenes va principiar a les 20.30 hores y nél el tríu compuestu por Xosé Antón Fernández ‘Ambás’, Pepín de Muñalén y Elías García va interpretar cantares del so repertoriu, compuestu por temes recuperaos por Ambás a lo llargo de tola xeografía asturiana. El grupu ta acabante d’asoleyar el so tercer discu, ‘Tuenda 3’, nel que per primer vez toquen canciones de Colunga, Quirós, Teberga o Ponga.
 
Un poco antes, a les 19 hores, Toli Morilla va tar na FNAC de Parque Principado presentando la segunda edición del so discu tributu a Bob Dylan, compuestu por diez versiones de temes del cantautor estauxunidense tornaos al asturianu. Les persones qu’acudan al centru comercial sierense van poder sentir los temes de ‘Diez cantares de Bob Dylan n’asturianu’ na selmana na que l’artista de Minnesota cumplió 70 años.
 
Otra actuación destacada del sábadu n’Asturies ye la del cantautor madrilanu Javier Bergia (21 hores, Acapulco). Mentes, el domingu, Nacho Vegas va actuar nel Teatru Campoamor a partir de les 20 hores.