‘El Descorche La Llaguna’, folixa nueva alredor de la sidra en L'Entregu

Dende esti vienres y hasta’l domingu, L’Entregu va vivir ‘El Descorche La Llaguna’, folixa nueva alredor de la sidra. Trece llagares van participar nesta actividá que tamién va tener un mercáu popular, xornaes gastronómiques y verbenes.
 
Esta primer edición de ‘El Descorche La Llaguna’, qu'entama la Sociedá Cultural y de Festexos L'Entregu, va principar güei con una verbena na que van participar La Orquestina y Salaítos, pa depués dar pasu a la música disco. Pero enantes de les actuaciones musicales, les persones que s’averen a L’Entregu van poder disfrutar d’un menú gastronómicu cola sidra y la mazana como ingredientes principales. La Tená, El Zamorano, La Conda y Mejuto son los establecimientos qu’ufren esti menú hasta el domingu a la hora de la xinta y de la cena pol preciu de 18 euros.
 
El día grande d’esta folixa nueva del conceyu de Samartín del Rei Aurelio ye’l sábadu. A primer hora va inaugurase’l mercáu popular nel que participen 30 espositores d’artesanía y alimentación tradicional pa, a les 12.30, descorchar les primeres botelles de los 13 llagares que participen na celebración: Arbesú, Buznego, El Piloñu, Foncueva, Gobernador, JR, Los Angones, Los Roblones, Menéndez, Orizón, Roza, Trabanco y Viuda de Corsino. La organización va ufrir pa tolos interesaos un vasu conmemorativu al preciu de 3 euros pa disfrutar d'una sidra que va repartise ente les 12.30 y les 14.30 hores, pela mañana, y ente les 18 y les 20 hores, pela tarde. La xornada va pesllase con música discu nel mesmu parque La Llaguna y go-gos hasta bien entrada la madrugada.
 
El domingu, el mercáu va abrise al meudía y va poder visitase hasta les 22 hores. Pela tarde, a les 18 hores, ta previsto l’actuación del Grupu d’Entografía y Folclor L’Esperteyu.