Pablo Pérez: “Esti conceyal ye frutu del trabayu de munchos años nuna mesma direición”

Tres delles eleiciones raspiando’l conceyal, la izquierda nacionalista consiguió por fin entrar na Casa Conceyu de Noreña. Pablo Pérez, de 31 años, ye’l primer representante qu’algama la candidatura d’unidá popular Conceyu Abiertu.
 
“Los resultaos qu’algamó Conceyu Abiertu por Noreña foron meyores de lo qu’imaxinábamos, yá que tuvimos cerca de conseguir un segundu conceyal”, apuntó Pérez, que considera que la distribución actual de la Casa Conceyu favorece a la so formación. “L’escenariu nun queda claro y podemos condicionar les polítiques que vayan facese nel conceyu”, asegura.
 
PSOE y Independientes por Noreña (IPÑ) son les dos fuercies qu’aspiren a facese cola alcaldía, pero nenguna de les dos tiene un camín fácil per delantre. Los socialistes, que na llexislatura anterior pautaron con IX-LV y Unión URAS-PAS, dos formaciones que nesta ocasión quedaron fuera de la Casa Conceyu, tienen 4 conceyales por 3 del partíu llocal nuevu. Tamién tienen representación el PP (2 conceyales), el Frente de la Izquierda (1), FAC (1), Conceyu Abiertu por Noreña (1) y Ideas (1). Una situación que fai pensar nun gobiernu en minoría pa los cuatros años próximos en Noreña.
 
La posición de Conceyu Abiertu por Noreña va tar na oposición, dende onde Pérez piensa “dar apoyos concretos naquellos asuntos que surdan según avence la llexislatura, ensin mirar de quién procedan les propuestes, sinón el por qué d’eses propuestes”. Ente los oxetivos d’esti mozu que milita n’Andecha Astur ta la instauración d’una democracia participativa nel conceyu, sacar alantre unes ordenances d’oficialidá y, al empar, encadarmar los movimientos sociales del conceyu.
 
“La consecución d’esta conceyalía ye frutu del trabayu de munchos años nuna mesma direición”, asegura Pérez, que señala que’l mou de trabayu asambleariu na eleición del candidatu de Conceyu por Noreña y la ellaboración del programa elleutoral en conceyos abiertos a tola población tamién ayudó a algamar el 8,63 por cientu de los votos. Pa Pérez, el trabayu “dende la base, dende los conceyos”, ye’l camín a siguir magar que pueda paecer “más llargu”. “Hai que tener presencia nos conceyos, tener alcaldíes, y trabayar muncho pa llueu algamar resultaos a nivel nacional”, afirmó.