La Casa Posafuelles zarra les sos puertes esti vienres

Tres casi seis años d’actividá, el chigre de la Xunta pola Defensa de la Llingua Asturiana, La Casa Posafuelles, va zarrar les sos puertes esti vienres. Circunstancies normatives sobre'l llocal y económiques obliguen a tomar esta decisión.
 
Sicasí, dende’l coleutivu en defensa de la llingua del país señalen que yá tán a la gueta d’un llocal nuevu más afayadizu onde siguir con una actividá qu’entamó nel chigre’l Naranco y que continuó na Cuesta La Vega númberu 10 col Posafuelles. “Faciendo balance d’esta etapa, tamos satifechos del llabor de visibilización del idioma y mui agradecíos a les mil y milenta persones que collaboraron nes actividaes. Foron más de dos centenares los conciertos, les presentaciones de llibros, discos y revistes, les fiestes...”, comenten dende la Xunta pola Defensa de la Llingua Asturiana.
 
Pa esta última xornada del chigre de la Xunta ta previsto una folixa con música, bébora, comida y sorpreses, que va principiar a les 20 hores. “Convidamos a tola xente a celebrar con nós la despidida de La Casa Posafuelles na so ubicación actual”, señalen los responsables del coleutivu.