Ballesteros: “Nun vamos apoyar nengún alcalde que nun sía d’Asturianistes por Nava”

Los resultaos d’Asturianistes por Nava-Compromisu por Asturies nes eleiciones del domingo foron perbonos. La formación ye la segunda fuercia más votada nel conceyu navetu, con tres conceyales, y va sentase a negociar con tolos partíos.
 
Emilio Ballesteros, candidatu a l’alcaldía d’Asturianistes por Nava, asegura “que los resultaos del domingu en Nava foron escelentes pa nós. Nun esperábemos ser la segunda fuercia más votada tres el PSOE, y más col tsunami que supunxo la entrada de FAC na escena política asturiana”. La formación asturianista tenía como oxetivu mantener los dos conceyales que tuvo nes dos llexislatures anteriores y nesta ocasión suma uno más que podría inclusive proporciona-y l’accesu a l’alcaldía.
 
Nes eleiciones del domingu, el PSOE algamó 5 conceyales al sumar 1.114 votos (33,96 por cientu), mentes qu’Asturianistes por Nava-Compromisu por Asturies obtuvo trés al llegar a los 723 (22,04 por cientu). Foro Asturias Ciudadano (FAC) tamién cuenta con 3 conceyales al tener 621 apoyos (18,93 por cientu) y el PP dos, con 603 votos (18,38 por cientu). “Lo normal ye que gobierne’l PSOE en minoría”, señala Ballesteros, que comenta que’l problema de Nava n’actualidá ye de déficit pola aición del equipu de gobiernu ‘socialista’ y que la xestión de la Casa Conceyu ye complicada anguaño. Sicasí, asegura que nun va tener problema en sentase a falar y negociar coles otres tres formaciones con representación con una puntualización: “Nun vamos apoyar nengún alcalde que nun sía d’Asturianistes por Nava”.
 
El cabeza de llista de la formación asturianista llocal, que collabora con Bloque por Asturies-Unidá Nacionalista Asturiana (UNA) como demuestra l’usu de la so marca ‘Compromisu por Asturies’, quinxo agradecer l’apoyu que recibió de la coalición nacionalista y la confianza de los vecinos de Nava, a los qu’espera “nun defraudar”. Entrugáu sobre los resultaos del asturianismu a nivel nacional, Ballesteros señaló que “falla muncho la comunicación. El nuesu mensaxe cala na xente mui comprometío, con ideales, pero non nel gruesu de la xente. Por eso ye importante tener presencia nos conceyos, contar con alcaldíes, pa que la xente pueda dase cuenta de que les nueses idees pueden ponese en práutica y ayudar a xestionar bien les instituciones”.