El votu emigrante podría dar un diputáu más al PSOE pel occidente

El miércoles va principiar el recuentu del votu emigrante, menor nesta ocasión que n’años anteriores pola necesidá de rexistru nun censu y la imposibilidá de votar nes municipales. El PSOE podría ganar un diputáu en detrimentu de FAC pel occidente.
 
Pa ello, necesitaría superar al partíu de Francisco Álvarez-Cascos en 635 votos nel recuentu del votu emigrante na circunscripción occidental, onde votaron un total de 2.150 persones. Una opción posible pola supremacía que suel tener el PSOE nel esterior, pero que los propios ‘socialistes’ ven complicao que se dea.
 
De confirmase esti cambiu nel occidente, pasaría a garrar l’acta de diputada María Verena Prendes, mentes que quedaría fuera de la Xunta Xeneral, Gervasio Acevedo. Nesi casu, el PSOE pasaría a tener 16 escaños, por 15 de FAC, pero la derecha siguiría teniendo la mayoría absoluta. Otra posibilidá que pue propiciar el votu emigrante ye que fora’l PP el partíu que perdiera’l diputáu, aunque tendríen que dase unos resultaos mui sorprendentes y éstos tampoco influiríen. Tres el recuentu de votu presencial, les tres formaciones tienen dos escaños cada una: Fernando Lastra y María Jesús Álvares (PSOE), Alfonso Román López y Matías Rodríguez (PP), y Isabel Marqués y Gervasio Acevedo (FAC).
 
Nestes eleiciones, el votu emigrante baxó de forma significativa de 15.157 a 8.477. Na circunscripción central y oriental, los asturianos nel esterior nun van influyir de nenguna manera.