Palacios: “El resultáu de les eleiciones ye mui malu pa la izquierda y pa esti país”

Bloque por Asturies-UNA va aconceyase esta selmana p'analizar los resultaos de les eleiciones, estudiar el marcu políticu actual y tomar decisiones. El so candidatu, Rafael Palacios, señaló que'l desenllaz del 22-M “ye mui malu pa la izquierda y pa esti país”.
 
Palacios reconoció que los resultaos de la coalición nacionalista tán “perbaxo de les nueses espectatives” y, por eso, quier reunise col equipu de trabayu de les dos formaciones p’analizar la situación actual y sacar conclusiones “nun marcu complicáu” tres el trunfu de la derecha. “Enantes vivimos como partíos d’izquierda facíen polítiques de dereches y agora veremos como la derecha fai polítiques de dereches”, comentó.
 
El candidatu de Bloque-UNA quinxo agradecer “a la xente el trabayu y el compromisu militante”, pa depués destacar que 500 persones trabayaron na campaña d’una coalición que llevantó esperances nel asturianismu. Tamién felicitó “a los cinco conceyales que vamos tener”, en referencia al de Carreño y Ḷḷena, y los tres d’Asturianistes por Nava. Entrugáu pola continuidá del pautu con UNA tres estos resultaos, Palacios señaló que la voluntá del alcuerdu “nun yera namái pa estes eleiciones” y añadió qu’hai qu’analizar “esti marcu políticu nuevu”.