Pilar Varela va repetir como alcaldesa d’Avilés

Col recuentu de votos completáu, Pilar Varela va repetir como primer edil n’Avilés. El PSOE suma un total de 10 conceyales al rexistrar 14.864 votos (33,83 por cientu), cantidá suficiente pa gobernar en minoría o pautar con IX-LV, formación qu’algama 3 conceyales con 5.222 votos (11,89 por cientu). Mentes, FAC y PP sumen 6 conceyales cada ún con una cantidá de votos mui similar: 9.338 (21,39 por cientu) la candidatura de Pablo Sánchez Lorda, y 9.201 (20,94 por cientu) la del popular Constantino Álvarez.

L’Agrupación Social Independiente d’Avilés (ASIA), que contó con 4 conceyales (13,7 por cientu de los votos) nes eleiciones últimes, nun entraría na Casa Conceyu al sumar namái 1.369 votos, un 3,12 por cientu del total. UPyD sería la sesta fuercia llocal más votada (3,11 por cientu); Los Verdes-Grupo Verde, la sétima (0,95); y Bloque-UNA, la octava (0,72 por cientu) al sumar 316 votos. Pela so parte, Unión URAS-PAS, algamó 187 votos, un 0,43 por cientu de los votos.