Los llectores d’Asturies.com creen que PP y FAC van pautar si pudiesen gobernar tres el 22-M

El 85 por cientu de los usuarios que participaron na encuesta del especial ‘Eleiciones 2011’ d’esta selmana creen que la derecha va pautar si PP y FAC sumen el númberu suficiente de votos pa gobernar. Les encuestes espublizaes hasta la fecha apunten a esta posibilidá, puesto que dan ganador al PSOE en minoría y la suma de los escaños de la derecha imposibilitaríen un pautu de los ‘socialistes’ con IX-LV.
 
Les discrepancies internes que llevaron a Francisco Álvarez-Cascos a promover la fundación de Foro Asturias Ciudadano (FAC) pa presentase a les eleiciones tres la declaración d’Isabel Pérez-Espinosa como candidata de los populares a la presidencia d’Asturies nun van suponer una torga n’opinión del 85 por ciento de los nuesos llectores, que creen que dambes fuercies van pautar pol poder. Mentes, un 15 por cientu consideren que nun va haber alcuerdu pa gobernar.
 
Nesti sen, hai que destacar les declaraciones de Gabino de Lorenzo feches güei a COPE Asturies nel que declaró que ye partidariu de llegar a alcuerdos con FAC si la llista del partíu d’Álvarez-Cascos ye la más votada. Tiempu depués, matizó les sos pallabres y afirmó qu’esa decisión depende de la direición del partíu n’Asturies.