Descubiertos diez nuevos casos de descendientes d'asturianos desapaecíos demientres la dictadura arxentina

El director de l'Axencia Asturiana de Cooperación al Desarrollu, Rafael Palacios, fizo güei públicos diez nuevos nomes qu'añadir a la llista d'asturianos o descendientes d'asturianos desapaecíos por mor de la política de represión de la dictadura arxentina (1976-1983). En total, yá son 26 les persones identificaes, si bien considera que la llista va dir aumentando.
 
Asina lo anunció en rueda prensa, na que mostró la llista total de 26 nomes. Los nuevos casos son: Roberto Horacio Bugatti Ossvald (nietu d'asturiana), Marcelo Aníbal Castello Greco (nietu d'asturianu), Guillermo Ángel Ercolano Cortina (fíu d'asturiana), Hernán Jorge Henríquez Sáez (nietu d'asturianos), Cecilia Aurora Minervini (nieta d'asturianu), Óscar Miranda Silva (nietu d'asturianu), Horacio Vital Pedraza García Guerra (fíu d'asturianos), Alberto Armando Pruneda Caputo (nietu d'asturianos), Jorge Horacio Santamarina Rey (descendiente d'asturianos, sin especificar parentescu), Carlos José Crespo Rodríguez (nacíu n'Asturies, la so ma, concretamente, nació na casería Calleras, en Navelgas, Tinéu).
 
Los nueve primeros nomes los facilitó la Secretaría de Derechos Humanos del Ministeriu de Xusticia y Derechos Humanos d'Arxentina, mientres que'l restante lu comunicó l'Asociación de Familiares y Desaparecidos del Estado Español en Argentina.
 
La identificación de los descendientes d'asturianos ta realizándose nel marcu de dos proyeutos que cuenten con financiación del Principáu d'Asturies: 'Reconstruyendo memoria' y 'Recuperando dignidad', pa los que'l Gobiernu autonómicu reservó 160.000 euros. Amás, según esplicó Palacios, tamién se destinaron otros 50.000 euros pa un programa d'identificación xenética per parte d'un equipu anatómicu forense d'Arxentina.
 
Palacios se mostró seguru de que la llista va diguir aumentando y recordó que yá nel so día, cuando s'anunciaron los primeros casos, se previó un incrementu progresivu del númeru de nomes. "Agora yá tenemos 26", añadió.
 
Per otra parte, l'Axencia ta estudiando la posibilidá d'entamar investigaciones asemeyaes referíes a les dictadures militares de Chile (1973-1991) y Uruguai (1973-1985). Esti órganu autonómicu considera que pue haber munchos asturianos desapaecíos ente la llista de víctimes de la represión de damos reximes.