Les encuestes espublizaes esta fin de selmana mantienen al PSOE como ganador n’Asturies

Dos encuestes nueves dan como ganador n’Asturies al PSOE y mantienen la dulda sobre los resultaos de Foro Asturias Ciudadano (FAC) y el Partido Popular (PP), perseguidores de la FSA nos sondeos. Amás, per primer vez inclúin los resultaos de los conceyos más poblaos del país: en Xixón torna a ganar el PSOE, al igual que n’Avilés, y De Lorenzo continúa mandando n’Uviéu. IX-LV sería la fuercia más votada en Mieres.
 
El trabayu d’Ipsos pa ‘La Nueva España’ reflexa una igualdá importante ente’l PSOE y PP. Asina, los ‘socialistes’ algamaríen 16 o 17 escaños al sumar un 32,1 por cientu de los votos, y los populares 15 o 16 con un 30,1 por cientu de los votos. La tercer fuercia, más alloñada, ye FAC con 9 escaños (19,7), mentes qu’Izquierda Xunida-Los Verdes d’Asturies (IX-LV) se quedaríen con cuatro diputaos al rexistrar un 10,9 por cientu de los votos. Esta encuesta nun inclúi los resultaos de los partíos restantes y namái señala un 4,6 por cientu de los votos pa ‘otros’. Sicasí, na ‘intención/simpatía de votu’ por circunscripciones marca que’l Bloque por Asturies-Unidá Nacionalista Asturiana (UNA) –nel sondéu sal rexistráu como ‘BA-UNAS’– algamaría un 0,7 por cientu na occidental, un 0,3 por cientu na central y un 0,0 por cientu na oriental; y Unión URAS PAS, un 0,0 por cientu na occidental, un 0,4 por cientu na central y un 0,7 na oriental.
 
Nos conceyos, el PSOE de Xixón podría reeditar pautu con IX-LV al sumar 11 (37,5 por cientu de los votos) y 4 conceyales (13,6), de manera respeutiva, por 6 del PP (20,4) y otros 6 de FAC, anque con más votos que los populares: 20,6. N’Uviéu, esta encuesta señala que Gabino de Lorenzo mantendría la mayoría absoluta: 15 conceyales con un 47,5 por cientu de los votos. La segunda fuercia más votada sería’l PSOE con 7 conceyales (22,5), seguida d’IX-LV con 2 (9), FAC con otros dos (7) y ASCIZ con 1 (6). Na tercer villa d’Asturies, Avilés, el PSOE y IX-LV ampliaríen la mayoría de gobiernu al sumar 11 (39,7) y 3 conceyales (10), por 7 del PP (24,8), 2 de FAC (9,5) y l’Agrupación Social Independiente de Avilés (ASIA) con otros 2 (9,3).
 
N’otros conceyos, el PSOE ganaría pola mínima en Siero (27,7 por cientu) y en Llangréu con suficiencia pero ensin mayoría absoluta (40,5), mentes qu’en Mieres el trunfu sería pa IX-LV al sumar 8 conceyales (33 por cientu) y el PSOE, 7 (31,4).
 
Pela so parte, la encuesta espublizada por ‘El Comercio’, fecha por Ikerfel, sobre los resultaos nos conceyos principales rexistra diferencies con respeuto a la de ‘La Nueva España’. Asina, en Xixón sitúa a Unión Progreso y Democracia cerca d’un conceya al sumar un 4,8 por cientu de los votos, y da la victoria al PSOE con 12 conceyales (38,1). El PP se quedaría con 11 (30,4) y FAC se quedaría con 3 o 4 (12,3). IX-LV mantendría los dos actuales con un 7,6 por cientu de los votos. Mentes, Unión URAS-PAS algamaría un 2,6 por cientu de los votos y Bloque-UNA, un 1,7.
 
Esti sondéu, por contra, señala que De Lorenzo podría perder la mayoría absoluta n’Uviéu al sumar 13 o 14 escaños con un 43,6 por cientu de los votos. El PSOE algamaría 7 o 8 (24,6), el FAC 3 o 4 (12,2), IX-LV 3 (11,4) y UPyD o ún o nengún (4,8 por cientu). D’esta forma, se quedaría fuera de la Casa Conceyu ASCIZ, al que la encuesta da una estimación de votu del 1,5 por cientu. Unión URAS-PAS algamaría resultaos peores que nes eleiciones última al sumar namái un 0,3 por cientu de los votos. N’Avilés, pela so parte, ganaría’l PSOE, con 10 escaños (36,4); siguíu del PP, con 6 (20,8); el FAC, con 4 (14,9); IX-LV, con 3 (13,2); y ASIA, con 2 (9,8). D’esta forma, PSOE y IX-LV podríen reeditar el pautu de gobienu. Hai que destacar qu’Unión URAS-PAS meyora los sos resultaos nes municipales d’Avilés al pasar d’un 1,66 por cientu del 2007 al 2,6.
 
Otra manera, una encuesta fecha por Sigma Dos para’l periódicu madrilanu ‘El Mundo’ sobre les eleiciones asturianes da como ganador al PSOE con un 33,4 por cientu de los votos (17 escaños), anque da la oportunidá de gobernar a una derecha na que Francisco Álvarez-Cascos suma más votos. Asina, FAC se quedaría con 12-14 escaños (25,8) y el PP, 11-12 (24,2). IX-LV sería la cuarta fuercia na Xunta Xeneral con 3 o 4 escaños a rexistrar un 9,1 por cientu de los votos. Esti sondéu nun recueye los datos de más partíos y da un 7,5 por cientu a ‘otros’.