Bimenes convoca’l XII Concursu de Gaiteros y Gaiteres Mozos

Los músicos que quieran participar nel XII Concursu de Gaiteros y Gaiteres Mozos de Bimenes yá pueden unviar la so propuesta a la Casa Conceyu yerbata. Nél pueden participar menores de 21 años a fecha del 30 de xunu.
 
Los participantes nesti concursu, que celebra la so final a les 18 hores del 2 de xunetu dientro de la XV Fiesta de la Oficialidá de La Llingua Asturiana, han de pasar enantes una preseleición o semifinal que va tener llugar el 25 de xunu, a partir de les 11 hores, na Casa la Cultura de Santuyano siempre qu’haya más de diez persones inscrites. Nes dos fases, los concursantes han d’emplegar como instrumentu una gaita tradicional asturiana –d’un solo roncón– en cualisquier de les sos modalidaes, asina como llevar el traxe tradicional asturianu.
 
Na semifinal, los gaiteros y gaiteres van poder interpretar un tema de llibre eleición, mentes que pa la final van tener que tocar un temar llibre y dos pieces a escoyer ente les siguientes –nun son válidos los añadíos o supresiones–: Muñeira de Remis, Floréu de Remis, Diana floriada de Veriña, Fandangu puntiáu, Muñeira Barganaz, Xota’l Centru, Muñeira Lliberdón, Alborada’l paxarín, Xota l’oriente, Carretera d’Avilés y Saltón. El ganador del Concursu va tener un premiu de 300 euros, más troféu; el segundu clasificáu, 200 euros y troféu; y el terceru, 100 euros y troféu.
 
Pa inscribise nel concursu ye necesario unviar un corréu con tolos datos personales y una fotocopia del DNI al Ayuntamientu de Bimenes, cola referencia ‘XII Concursu de Gaiteros y Gaiteres Mozos’, Martimporra s/n 33527 de Bimenes. El plazu pa inscribise termina'l 20 de xunu a les 12 hores. Los interesaos pueden consultar les bases nesti enllaz.