El repartu de mazana ecolóxica, estratexa eleutoral de Los Verdes d’Asturies

Los Verdes d’Asturies, formación que va en coalición con Izquierda Xunida (IX), ta llevando en marcha una estratexa eleutoral novedosa. Ésta consiste na entrega de mazanes ecolóxiques en bolses reutilizables xunto con un conteníu informativu.
 
Los ecoloxistes escoyeron esta forma tán orixinal pa facer campaña cola intención de nun repetir los “discursos abstractos” que faen la mayor parte de los partíos políticos y, al mesmu tiempu, ser útil a la ciudadanía. Asina, baxo’l nome de ‘Educación Ambiental Eleutoral’, Los Verdes usen esta bolsa y el so conteníu pa “esplicar a la xente la conveniencia d’evitar l’usu de plásticu y derivaos del petroleu y el yacimientu d’emplegu que supón el campu asturianu, con un potencial enorme, pues malpenes producimos el 5 por cientu de lo que consumimos en productos de güerta y fruta; inclusive en mazana importamos el 30 por cientu”, esplica esplica Olga Álvarez, conceyala de la formación en Mieres, qu’asegura que “la mayoría de lo que s’importa pue producise equí. Namái ye inevitable importar productos que tean fuera de temporada”.
 
El conteníu concretu d’esta bolsa que, pel momentu, repartióse n’Avilés, Villaviciosa, Ponga, Salas y Mieres, ye “una mazana cultivada ensin abonos nin plaguicides químicos de nengún tipu; un folletu contra la incineradora, que ye onde acabaríen les bolses de plásticu usaes, dalgo que pretendemos evitar regalando éstes de tela reutilizable y plegable; un trípticu esplicando lo que fai’l Bancu de Tierres; otru sobre la Política Forestal; y la propaganda eleutoral de la candidatura de IX y Los Verdes”, añade Álvarez. En total yá se distribuyeron 1.300 bolses.
 
Otra manera, Los Verdes d’Asturies desarrollaron en Salas esti sábadu una llimpieza del ríu Nonaya nel so tramu urbanu, pa depués celebrar una puya del oxetu más raru qu’atoparon. Ésti foi un dispositivu llétricu d’utilidá desconocida, que se vendió a cambio de dos chorizos a la sidra. D’esta forma, los ecoloxistes quixeron denunciar la situación d’abandonu que viven los ríos de la zona y de toda Asturies. Ernesto Sánchez, candidatu a conceyal en Salas, encargado de la puya del ‘outru campanu’, recalcó nesti actu la necesidá de cuidar los cursos fluviales y alvirtió del peligru de los residuos de la minería de oru y de les aveníes d’agua nes zonas inundables urbanizaes.