Miranda: “Ye necesario esixir unos mínimos a los conceyos que permitan avanzar na normalización”

El SNL de Piloña peslló esta selmana per segunda vez dende la so creación. Penélope Miranda Fernández (Uviéu, 1977) ye responsable del de Ḷḷena y presidenta de l’Asociación de Trabayadores de la Normalización Llingüística.

¿Cómo foi la trayeutoria del Serviciu de Normalización Llingüística de Piloña?
 
La responsable del Serviciu de Normalización Llingüística de Piloña yera Paula Cristóbal Caso. Llevaba al frente del SNL dende l’entamu. Nel añu 2009 el Conceyu Piloña creó un Serviciu de Normalización Llingüística y sacó a convocatoria una plaza pa cubrir el puestu de trabayu, qu’entamó a furrular el día 1 d’avientu. El trabayu aparó, porque’l SNL zarró’l 31 de marzu del 2010. Esi añu sacóse otra vez la plaza a convocatoria pública, el SNL abrió nuevamente’l 12 de mayu del añu pasáu y peslló agora otra vez, el día 11 de mayu del 2011.
 
¿A qué se deben estos pieslles y reapertures?
 
Débese a dellos factores. Ún d’ellos y evidente, ye la falta de compromisu por parte del Conceyu de Piloña. Ta claro que nun asumieron lo que significa tener un SNL y nun afrontaron la normalización d’una manera planificada, seria y ambiciosa. Les contrataciones dependen de los conceyos, pero teniendo en cuenta que reciben financiación pública nun somos a entender cómo la Conseyería de Cultura nun lleva control sobre lo que pasa nos Conceyos con SNL. Ye una dexación de funciones y otru de los factores qu’inflúin na inestabilidá y nel trabayu de los servicios.
 
Dende l’ATNLL siempre defendimos que la financiación actual nun val. Ye necesario esixir unos mínimos a los conceyos que permita dir avanzando na normalización llingüística. Necesítase un compromisu mayor de la Dirección Xeneral de Política  Llingüística, más control sobre lo que se ta faciendo nos conceyos.
  
Hai poco más d’un añu, tres roblar un conveniu cola ALLA, l’alcalde Camilo Montes destacaba’l compromisu de Piloña pa col asturianu pero’l casu ye que nun s’aceptaben escritos n’asturianu na Casa Conceyu.
 
Tenemos constancia de que’l SNL nun podía rexistrar documentos n’asturianu. Una decisión que deberíen esplicar los responsables políticos del Conceyu de Piloña. Nun entra na cabeza de naide que per un llau reciban una subvención pa un SNL y pel otru  esi serviciu nun pueda usar la llingua qu’ha prestixar y normalizar. Ye una decisión que nun s’entiende y pola que se deberíen tomar midíes dende la DXPL y dende l’ALLA pol incumplimientu del conveniu que firmó col Conceyu de Piloña.
 
 
¿Cómo repercute esta situación nel trabayu d’un SNL?
 
Evidentemente, de manera negativa. Una de les funciones del SNL ye consiguir llevar al asturianu a ámbitos onde nun llegaba, como ye’l casu de l’alministración. Un Conceyu que tien SNL asume implícitamente –o debería– que l’asturianu ye una llingua de trabayu más, polo que’l tramitar escritos n’asturianu debería ser una práctica normal y más viniendo del Serviciu de Normalización. Son estes coses absurdes y vergonzoses que pasen n’Asturies, como’l tener a la única Directora Xeneral de Política Llingüística del Estáu que nun usa públicamente la llingua qu’ha prestixar. Dende l’Asociación de Trabayadores de la Normalización Llingüística tenemos una actitú mui crítica coles les actuaciones últimes del Conceyu Piloña y pidimos a la Dirección Xeneral de Política Llingüística que s’aconceyen col alcalde y responsables del Conceyu pa buscar soluciones y dar pasos p’alantre, non p’atrás.
 
¿Qué pasa agora cola trabayadora y les iniciatives que tenía en marcha?
 
La situación llaboral de la nuestra compañera ye que ta ensin trabayu. La so vuelta ta condicionada a superar la prueba de selección qu’el Conceyu convoque, poque tien la financiación pal 2011 aprobada. No tocante a les iniciatives, habrá qu’esperar a ver cómo s’igua esta situación, pero’l SNL yá taba trabayando nos proyectos del 2011, amás del trabayu que taba desarrollando col procesu d’implantación de la toponimia oficial, dando información y asesoramientu, faciendo traducciones, etc. Agora mesmo debería tar asesorando a asociaciones y empreses pa la convocatoria de subvenciones de normalización llingüística del asturianu convocaes pola Conseyería de Cultura y Turismu. Ye un parón nel trabayu diariu que ye básicu na normalización llingüística.
 
La situación de Piloña nun ye única. ¿Cómo ta’l casu del SNL de Mieres?
 
Va poco Consuelo Vega dixo nunes declaraciones, onde falaba de la “estabilidá” de los SNL, que lo de Mieres yera un casu puntual. La verdá ye que de puntual yá pasó a habitual, porque tolos años se vive la mesma situación. El SNL pieslla unos años seis meses, otros ocho, prácticamente dende qu’abrió. Dende l’ATNLL venimos pidiendo soluciones dende hai tiempu, presentando propuestes que nun s’escuchen. La idea d’estabilidá que se quier tresmitir dende la conseyería paeznos como poco engañosa porque la realidá va per otru llau.  
 
¿Hai dalgún otru SNL con problemes de continuidá?
 
Les dudes coles que les y los trabayadores de la normalización acabamos l’añu son abondes. Munches de les persones que trabayen nos SNL firmen la carta de cese tolos años, aguardando que llegue la financiación autonómica. El plazu nel que se comuniquen les ayudes a los conceyos ye mui axustáu y delles veces se dio la situación de que los SNL pesllaren los dos primeros meses del añu como Llaviana o Samartín del Rei Aurelio, hasta rematar tola burocracia alministrativa. Yá se faló de qu’amás ye necesario qu’eses ayudes lleven un compromisu por parte de los conceyos y asegurar qu’esi dineru público s’invierta en normalizar tresversalmente l’asturianu, cosa que nun se ta faciendo.
  
¿Qué porcentaxe de responsabilidá tien la Dirección Xeneral de Política Llingüística nesti tipu de situaciones?
 
Un porcentaxe bien grande. Equí tamos centrándonos nos problemes de los SNL, que yá tuvimos desplicando, pero ¿qué pasa colos conceyos onde nun hai Serviciu de Normalización? ¿Ónde ta l’usu tresversal del asturianu na alministración? ¿Cómo ye posible qu’en cuatro años nun se redactara un Plan de Normalización? ¿La normalización solo consiste en xestionar subvenciones, la Selmana de les Lletres y dellos premios lliterarios? La llista ye bien llarga, polo tanto la responsabilidá de la Dirección Xeneral va más p’allá de los Servicios de Normalización.
 
¿Les eleiciones van marcar el futuru de munchos SNL?
 
Llamentablemente sí, porque’l trabayu de los servicios de normalización debería ser el mesmu independientemente de qué partíu tea gobernando. Los SNL dependen de dos alministraciones, la local y l’autonómica, y, polo tanto, de los partíos que gobiernen nuna y n’otra. Dende’l Gobiernu autonómicu, que ye quien tien la competencia en materia llingüística, puen adoptase midíes que favorezan el procesu de normalización y midíes que favorezan tolo contrario. Amás hai que conxugar too esto con quien gobierne en cada conceyu, que pue adoptar les mesmes pa una cosa o pa la contraria. La situación na que ta la llingua asturiana nun ye un problema social, ye un problema políticu. Son los gobernantes los que deciden hasta ónde tien quieren que llegue la normalización llingüística.
  
¿Cuántos SNL tán furrulando agora n’Asturies?
 
Ensin contar con Piloña, 14.
 
¿Cómo ye la rempuesta de los ciudadanos ante’l trabayu de los SNL?
 
Positiva y sobre too normal. Les campañes que se faen dende los SNL tienen como característica la tresversalidá. Inténtase llegar a lo sociedá con menxases actuales y interesantes como la igualdá, la salú, la sexualidá, el mediu ambiente… Los sectores a los que se dirixen son mui amplios, dende la hostelería a la mocedá o’l comerciu. La sociedá yá ve normal que los conceyos usen l’asturianu pa comunicase cola ciudadanía y esi ye un pasu bien importante.
 
El mayor problema ye que nun hai una continuidá del llabor normalizador, nun hai una pollítica llingüística que refuerce’l papel de los conceyos. Si amás del trabayu de los SNL se pudiere contar con otres midíes que dende’l Gobiernu impulsaren la recuperación llingüística n’Asturies, tenemos la seguridá de que la realidá diba ser bien otra.
 
¿Ye importante el trabayu en rede pa facer visibles les campañes puestes en marcha?
 
Cuando la Conseyería de Cultura creó la Rede de Normalización Llingüística nos Conceyos nacía cola idea d’optimizar les midíes normalizadores que se desenvolvíen nos conceyos y da-y mayor estabilidá y visibilidá. Asina ye como la presentó Ana Rosa Migoya na Selmana de les Lletres del 2004 en Xixón. Creóse un logotipu, editáronse les Orientaciones pa la normalización lllingüística nel ámbitu municipal y eso foi too.  Dende los SNL hai un empeñu inportante en que nun s’escaeza esa Rede, porque paeznos, qu’articulándola, pue valir pa facer una normalización más planificada, pa optimizar recursos. Por eso siempre incluímos el logotipu nes actuaciones que se desenvuelven. Pa la Conseyería de Cultura, la Rede de Normalización Llingüística nos conceyos simplemente nun esiste. Nesta llexislatura nun hubo nengún intentu d’articulala y nin de facela funcionar.  
 
Otru asuntu importante ye’l de la toponimia. ¿Por qué los conceyos faen oficial la tradicional y llueu nun la usen?
 
Un gran misteriu. Dende los SNL faise un trabayu, en munches ocasiones bien abegosu, pol cumplimientu de la toponimia oficial na alministración. En dellos conceyos el procesu ta llevando más tiempu pola dexadez de los equipos de gobiernu. A too eso hai que sumar que ye’l propiu Gobiernu del Principáu’l mayor incumplidor de la toponimia oficial, colo que treslladar a los conceyos la obligación del cumplimientu de la toponimia pue rayar nel absurdu cuando’l propiu Gobiernu qu’aprueba los espedientes nun la cumple.
 
Nun esiste un conveniu d’aplicación de la toponimia oficial col Estáu, lo que supón l’incumplimientu constante de los decretos nes carreteres estatales, por exemplu. Conceyos como Xixón estrenen una web con información turística qu’incumple la toponimia oficial. La RTPA, que debería ser un axente normalizador vital, incumple repetidamente la toponimia oficial. Eso na tele, porque na radio nin siquiera debieron enterase de la obligación que tienen de cumplila. Hai abondos exemplos, por eso ye necesario que se denuncien estos incumplimientos.
 
Pese a toles torgues, ¿nótase un avance na presencia del asturianu na cai en comparanza con una década atrás? 
 
Nótase mayor presencia, pero lo que destacaría ye la respuesta de la sociedá. Lo que dende los SNL se percibe ye que la mayoría de la xente asume ensin nengún problema nin trauma l’usu del asturianu por parte del conceyu. Si’l gobiernu asturianu tomara les midíes necesaries probablemente diba decatase de que l’asturianu nun ye nengún problema como quieren facer creer a la sociedá. Tamién ye posible que precisamente por eso nun lo faigan... El problema nun ta na sociedá, ta na política llingüística que se vien faciendo n’Asturies, o más bien no que nun se quier facer.