Cerca de 2.000 llitros de sidra tán preparaos en Sotrondio pal IV Certame de la Sidra

L’Asociación de Fiestes San Martín de Tours entama per cuartu añu’l Certame de la Sidra, qu’axunta a centenares de persones en Sotrondio. Nesta edición ta prevista la participación de 19 llagares que van repartir 2.000 llitros de sidra de baldre.
 
Gema Suárez, conceyala de Cultura de Samartín del Rei Aurelio, va inaugurar el Certame al meudía con una intervención nel quioscu de la música de la plaza de Ramón y Cajal y, de siguío, va principiar a correr la sidra pel llugar hasta les 14 hores, onde va haber un parón. P’amenizar los culinos, a les 12.15 hores el grupu de teatru Refaxu va representar la obra ‘Amores reñíos’, y a les 13 hores la Banda Música de Samartín del Rei Aurelio va ufrir un conciertu. Yá pela tarde, a les 17 hores va retomase l’actividá sidrera hasta les 21 hores. Tamién a les cinco la tarde va comenzar el III Concursu Nacional d’Escanciadores de Sidra, puntuable pal Campeonatu d’Asturies, y una hora más tarde, va actuar el Grupo Folklórico Blimea.
 
Les persones que quieran disfrutar de la sidra nesta xornada en Sotrondio van poder mercar pol preciu de tres euros un vasu de sidra nel qu’apaez el vieyu consistoriu que la organización encargó de forma especial pa esta edición del certame. Amás, San Martín de Tours va colocar un puestín con empanaes, bollos preñaos y dulces, aportación desinteresada de vecinos y hosteleros, pa recaudar fondos pa la celebración de le fiestes de xunetu.
 
Los llagares que participen nel IV Certame de la Sidra son Arbesú, Vallina, Viuda de Angelón, Zapatero, Orizón, Fonciello, Los Roblones, Los Angones, Cortina, Menéndez, Trabanco, El Gobernador, JR, Acebal, Argayón, Piñera, Frutos, Tomás y Roza.