Día del Llibru Asturianu

L’Sporting regaló’l partíu al Madrid

|

Perder contra’l Madrid ye evidentemente admisible, pero regalar el partíu de la manera que se fixo ayeri nun lo ye. Un Sporting faltu de fuerza, de llegada, de movimientu, incapaz d’ellaborar una xugada en condiciones o hasta de dar tres pases seguíos entregó’l partíu dende’l primer minutu a un Real Madrid mediocre, pero que ganó ensin dificultaes porque los xixoneses desaparecieron d’El Molinón durante los 90 minutos.

Poca historia tuvo’l regresu del Madrid a Asturies. Los visitantes salieron a tantear al Sporting durante los primeros minutos, hasta que se decataron que nun había rival enfrente. A partir d’esi momentu un Madrid ramplón xugó a placer, ente otres coses porque’l rival nin apaeció. D’esti mou entamaron a  cayer los goles na portería de Lafuente.  Primero Raúl al cuartu d’hora inauguró’l marcador, mientres qu’Huntelaar marcó’l segundu enantes xustu del descansu.

Y na segunda parte continuó la mesma dinámica. Terceru y cuartu llegaríen nes botes de Marcelo y de, otra vegada, Raúl, esta vez cola collaboración del porteru local Iñaki Lafuente. Nel últimu cuartu d’hora, gracies a Bilic y Kike Mateo, los asturianos espabilaron un poco, y por primera vez llevaron algo de peligru a la portería d’un casiqué inéditu Casillas. Un tiru al palu de Barral foi la única oportunidá clara del gol que tuvo l’Sporting nos 90 minutos.

Ayeri El Molinón esperaba al Sporting que derrotó al Valencia o al Sevilla. En cuentes d’eso, paez que salieron a entrenase los xuveniles del Madrid frente al primer equipu.

Mención aparte merez la recua de seguidores radicales del Madrid, que durante tol partíu dedicáronse a insultar al públicu d’El Molinón, exhibiendo amás simboloxía ultraderechista y con glayíos como “somos fascistas, somos madridistas”. Mui mala carta de presentación lleva’l Real Madrid con esti tipu de seguidores ultres.

Ficha Técnica

Sporting de Xixón 0- Real Madrid 4

Sporting de Xixón: Lafuente; Sastre, Gerard, Iván Hernández, Canella; Michel (Kike Mateo, m.60), Camacho, Luis Morán (Bilic, m.46), Carmelo; Diego Castro (Matabuena, m.60) y Barral.

Real Madrid: Casillas; Sergio Ramos (Parejo, m.79), Cannavaro, Pepe, Heinze (Torres, m.61); Gago (Javi García, m.70), Lass, Higuaín, Marcelo; Raúl y Huntelaar.

Goles: 0-1, m.15: Raúl; 0-2, m.37: Huntelaar; 0-3, m.50: Marcelo; 0-4, m.77: Raúl.

Árbitru: Mateu Lahoz (valencianu). Sacó tarxetes amarielles a Michel (m.25) y a Marcelo (m.50)

Comentarios

Perder de la manera na que se fixo ayer ye totalmente inalmisible. Errores graves na parcela técnica y una actitú impropia de xugadores que se llamen "profesionales".

Agora nun ye la hora de lamentase. Hai que pensar nel siguiente partíu contra´l Villareal y correxir errores. Tovia tamos ahí.
 
 

Ye verdá qu'hai que mirar p'alantre, y pensar yá nel Villarreal. Pero hai que dicir que la imaxe d'ayer foi llamentable como diz el compañeru.
Una cosa ye perder, y otra facelo como se fexo. Dalgunos xugadores tuvieron paseandose pel campu. Y esa camiseta que lleven nun ye pa pasease y menos si xuegues contra'l Madrid.
Esperemos qu'esti fuese l'ultimu sustu gordu que llevamos, y que salvemos la categoria mas o menos con tranquilidá. Asi l'añu que vien podemos ganalos. Pero claro, para eso fai falta dexar los coyones en campu.
 
Puxa Soprting y Puxa Asturies¡¡¡
 
 

Contador Estadistiques