MAS Corvera quier entamar un alderique ente los candidatos nel que puedan participar los vecinos

L’agrupación asturianista MAS Corvera señala que ta farta de “les acusaciones estériles” ente los partíos mayoritarios. Pa frenar esta “salsa rosa”, propón entamar un alderique ente tolos candidatos el miércoles, 18 de mayu, nel centru social Los Campos, cediendo asina l’espaciu concedíu al partíu pola Xunta Eleutoral.
 
La formación encabezada por Luis Emilio Cuesta critica enforma los tintes acusatorios que ta tomando la campaña eleutoral nel conceyu, sobremanera depués d’un buzonéu de cartafueyos per toda Corvera por parte de los partíos mayoritarios nos que nun paren de llanzase crítiques. “Nun ye de recibu qu’a los corveranos y corveranes métannos nel buzón fueyes a too color con más acusaciones que propuestes, y más cola situación económica que tamos sofriendo”, señala’l candidatu a l’alcaldía por MAS Corvera. Por ello, reclama a los partíos mayoritarios que “dexen de convertir la campaña eleutoral nuna salsa rosa de la política y que se dediquen a facer propuestes reales, útiles y resolutives”.
 
“A direncia de los globos sonda del PSOE, nós queremos una participación ciudadana y na transparencia de máximos, esto ye, que los vecinos tengan voz na propia campaña eleutoral, que tengan la opción de ver a los candidatos tal como somos y que sientan lo que caún tien que-yos ofrecer. Pa ello, tamos dimpuestos a ceder l’espaciu concedíu pola Xunta Eleutoral a MAS CORVERA, nel centru social de Los Campos, el próximu miércoles 18 de mayu” pa entamar esi alderique que propón el partíu asturianista, finaliza Cuesta.