El sector del automóvil n'Asturies pide a Gobiernu central y asturianu ayudes directes a la compra p'activar el mercáu

L'asociación del Automóvil del Principáu d'Asturies (ASPA) considera que la única forma de reactivar el sector ye mediante la concesión d'ayudes directes per parte de l'Alministración a la compra de vehículos, y criticó que'l Gobiernu central se centre única y esclusivamente n'ayudar a la industria del automóvil, dexando de llau a la venta y reparación. L'asociación consideró "urxente" estes ayudes, polo qu'indica que si'l gobiernu central nun lo fai "debería facelo'l Principáu".
El secretariu xeneral d'ASPA, Cesáreo Marqués, esplicó en declaraciones a Europa Press que "de nada val fabricar coches si nun se vienden", polo que dende'l sector s'apuesta por una ayuda directa a la compra, que pue tar ente los 1.500 o 2.000 euros, "non al traviés de programes como'l Plan VIVE".
Nesti sen, destacó que países como Alemañana, Francia Italia o Portugal, yá se punxeron en marcha ayudes directes que van de los 1.000 a los 2.000 euros, que yá tán dando resultaos. "Sabemos que n'Alemaña, onde l'ayuda ye de 2.000 euros, yá aumentaron les ventes, lo qu'al final repercute n'España tamién porque la fábrica Wolskvaguen en Navarra yá ta produciendo más", dixo Marqués.
 
El secretariu d'ASPA indicó qu'amás esi dineru'l Gobiernu diba recuperalu al traviés de la recaudación tributaria del automóvil, que tributa por IVA, por matriculación y por impuestu de carburante.
 
Dende la organización, tán convencíos de que les ayudes directes van tener munchu más efeutu que los descuentos de fabricante, porque "los compradores respuenden de diferente manera", y comparó l'ayuda que soliciten con otres yá puestes en marcha n'Asturies como la de la compra d'ordenadores.
 
Sobre la situación actual del sector del automóvil n'Asturies, Marqués afirmó que la situación sigue siendo mui mala con una cayida de les ventes d'un 20% sobre l'añu pasáu, polo que reclamó que la midida d'ayuda directa s'aplique "darréu".