Cultura reconoz otru contratiempu nes obres de Tito Bustillo al producise desprendimientos na cantera de Corcuvión

|

La construcción del muséu de la cueva ribesellana de Tito Bustillo, onde les obres tán paraes dende hai delles selmanes pola apaición na zona d'un nivel freáticu mui altu que torgaba la cimentación del edificiu, "van volver entamar próximamente", tal y como indicó güei a Europa Press el director xeneral de Patrimoniu Cultural Asturianu, José Luis Vega.
 
Amás del contratiempu nos trabayos que ye l'apaición d'agua, Vega aseguró que les obres cuenten con un nuevu factor a la so escontra. La cantera de Corcuvión ta esmoronándose polos trabayos que se tán executando nesta zona la llevantar el futuru Centru d'Interprestación de Tito Bustillo.
 
"Tenemos un nuevu problema y ye la cantera de Corcuvión, que polos trabayos ta esmoronándose y debemos actuar pa caltenela y evitar qu'esto pase, porque si hai desprendimientos, ye un peligru y na zona llóxicamente nun podía trabayase. El nuesu oxetivu ye facer un detalláu estudiu pa ver qué formes tenemos de consolidar la cantera y evitar too esto", sorrayó Vega.
 
Sobre les modificaciones del proyeutu, que Cultura tuvo que realizar pola presencia d'agua a un nivel non esperáu, Vega apuntó que los téunicos yá ficieron el so trabayu y el principal cambiu va ser la suxeción del edificiu al traviés d'un sistema de puente pa poder cimentar ensin problemes.
 
"Ye una téunica que nun va implicar un mayor gastu económicu, tampoco va allargase muncho nel tiempu la materialización d'esti imprtantísimu equipamientu", defendió Vega. Por estos cambios que fueron necesarios pa poder fixar los cimientos del edificiu, el futuru equipamientu va caltener el so diseñu estéticu pero sí va presentar dalgún cambiu.
 
"Al tar sobre un sistema de ponte'l sótanu, que taba contempláu de primeres nos planos como una sala de caltenimientu y p'acoyer la cafetería, va suprimise y va pasar al primer pisu", esplicó'l responsable de Patrimoniu Cultural asturianu, que tamién desveló dalgunos detalles novedosos sobre l'equipamientu.
 
"La cafetería, al subir una planta, va tener una terraza con vistes al Sella espectacular, enantes taba orientada al norte y nel sótanu, y agora va meyorar el so asitiamientu y por supuesto los futuros visitantes van agradecer esti espaciu con vistes privilexaes", relató Vega. El Principáu asegura que'l Centru d'Interpretación de Tito Bustillo va abrir les so puertes n'agostu del 2010.

Contador Estadistiques