SUATEA critica que políticos como Graciano Torre o Trevín tean apuntaos a la carrera profesional

SUATEA critica que políticos como’l conseyeru d'Industria, Graciano Torre, o Antonio Trevín, delegáu del Gobiernu estatal, tean apuntaos a cobrar l’incentivu de la carrera profesional. Anuncia que va llevar l’asuntu a los tribunales.
 
L'arbitrariedá y l'ausencia de respetu poles normes que la mesma “Alministración” nel procesu d'Evaluación Docente foron motivu de censurapal Sindicatu Unitariu y Autónomu de Trabayadores de la Enseñanza n’Asturies (SUATEA). Ente les persones señalaes pola agrupación tán, amás de Torre y Trevín,Soledad Saavedra, Faustino Álvarez Fonseca, Beatriz Vigil, Inmaculada González, Ramón Canal, Alfredo García Álvarez, Eustaquio Revilla, Manuel Ángel Riego y Román  Antonio Álvarez González. Tamién señalen qu’ente los almitíos nel 2007 taben l’ex conseyeru d'Educación y Ciencia, José Luis Iglesias Rioedre, y la ex direutora xeneral de Planificación, Centros y Infraestructures, María Jesús Otero, dambos imputaos pola operación ‘Marea’ de corrupción supuesta n’Alministración que mantién a la segunda en prisión.
 
“Creemos que los fechos falen por sí solos: clientelismu exercíu a costa del erariu públicu y una coleición de cargos, con actividaes que lleven décades alloñaes de la educación, que s'apunten a cobrar un incentivu en conceptu d'evaluación docente y a quien l'Alministración educativa facilita y almite l'adhesión”, remarquen dende SUATEA. Por ello, el sindicatu anuncia que va llevar “estes actuaciones a los tribunales de xusticia convencíos de la so absoluta illegalidá”, y calca na so esixencia de repartu llinial a tol profesoráu del dineru destináu a la evaluación docente nel camín de la homologación retributiva col profesoráu del restu de comunidaes autónomes.
 
Otra manera, Industria retrucó al sindicatu educativu que Torre “nun cobró nin va cobrar un solo euru” del plan d'evaluación docente mientres el tiempu que s'alcuentre en servicios especiales pola so condición de políticu.La Conseyería quinxo recordar que “la convocatoria realizada pola conseyería d'Educación y Ciencia contempla que pue presentar solicitú'l funcionariáu docente tanto en serviciu activu como en servicios especiales o d'escedencia, incluyéndose dientro de los servicios especiales los cargos políticos”.