Conceyu Abiertu por Samartín propón dotar a les cinco parroquies del conceyu d’asamblees consultives que convoquen a los vecinos cada tres meses

Xulio Llaneza Fernández, candidatu de Conceyu Abiertu a l’alcaldía de Samartín del Rei Aurelio, quier “defender y revitalizar la estructura en parroquies del conceyu Samartín” y “democratizar y acercar a los ciudadanos la institución del ayuntamientu”. Pa ello, propón la creación d’asamblees que convoquen a la población cada tres meses.
 
“Nel nuestru conceyu tenemos, en concreto, cinco parroquies que pensamos que representen la verdadera estructura sociopoltica dientro de la que’l ciudadanu d’esta tierra afáyase bien alredor de vecinos y de familiares, ensin complexos a la hora de desenvolver el so rol como ciudadanu”, señala Llaneza, que propón “dotar a cada una de les cinco parroquies o collaciones d’una asamblea o conceyu abiertu de calter consultivu y asesor, qu’ha de ser oyida y tenida en cuenta pol alcalde y por tola corporación municipal”. D’esta forma, según la intención del candidatu de Conceyu Abiertu, se formaría un conseyu direutivu integraos por tres vecinos, nomaos pol alcalde, que seríen los responsables de convocar, cada tres meses, a los vecinos a un conceyu abiertu pa tratar y debatir cualisquier asuntu o relacionáu cola vida pública de la collación.
 
Otra prioridá pal equipu de Llaneza, formáu “por 17 persones enfotaes en llevar aire nuevo y idees orixinales” a la Casa Conceyu, ye “democratizar y asturianizar la vida del ayuntamientu”. Asina, Conceyu Abiertu por Samartín quier acabar cola perceguera que tien muncha xente al Ayuntamientu y averalu a los ciudadanos, pa lo que Llaneza cree necesario tresperencia informativa. D’igual forma, apuesta pol usu de l’asturianu na alministración llocal al mesmu nivel que’l castellanu.