Dellos medios de comunicación espublicen encuestes que coloquen al PSOE como ganador y dan a Foro Asturias resultaos esperanzadores pa los sos intereses

Estos díes espublizáronse tres encuestes sobre la intención de votu nes eleiciones del 22 de mayu n’Asturies. Toes coinciden en dar como ganador al PSOE con mayor o menor diferencia con respeuto al Partido Popular (PP), anque nel casu del sondéu asoleyáu por ‘La Voz de Asturias/Público’, Foro Asturias Ciudadano (FAC) ta percima de los populares.
 
La encuesta de Publiscopia pa esti mediu de comunicación sitúa al PSOE como ganador con un 36,8 por cientu de los votos, lo que daría al partíu llideráu por Javier Fernández ente 19 y 18 escaños. FAC algamaría’l 25,5 por cientu de los votos (13-12 escaños), superando en cinco puntos al PP, que con un 20,9 por cientu se quedaría en 11-10 escaños. Mentes, Izquierda Xunida-Los Verdes d’Asturies (IX-LV) repeteríen porcentaxe de votos con respeuto a les eleiciones anteriores y con un 9,2 por cientu se quedaría con 3 o 4 escaños. Por último, Unión Progreso y Democracia (UPyD), con un 2,7 por cientu, rozaría un sillón na Xunta Xeneral. Los partíos asturianistes nun apaecen na encuesta.
 
Tamién ‘El Comercio’ espublizó un sondéu, fechu por Ikerfel, nel que les distancies ente PSOE, FAC y PP acórtense sobre manera. D’esta forma, los ‘socialistes’ sumaríen un 30,01 por cientu de los votos (16-14 escaños), el PP un 29,06 por cientu (15-14) y los de Francisco Álvarez-Cascos un 26,08 por cientu (11-12 escaños). IX-LV, con un 9,4 por cientu, mantendría los sos cuatro representantes, y UPyD algamaría un 2,8 por cientu que-y pon cerca del escañu. Mentes, quedaríen fuera de la Xunta Xeneral Unión URAS-PAS (1,4 por cientu) y Bloque por Asturies-Unidá Nacionalista Asturiana (UNA), al que la encuesta da un 0,4 por cientu, cantidá que paez alloñada de la realidá.
 
Por último, esti llunes diose a conocer la encuesta fecha por TNS-Demoscopia p’Antena 3-Onda Cero, qu’espón datos mui similares a la d’El Comercio ente PSOE, FAC y PP, anque dexen fuera de la Xunta Xeneral a UPyD y señalen la posibilidá de qu’IX-LV algamen hasta un total de 6 escaños al sumar el 10,4 por cientu de los votos. El PSOE ganaría les eleiciones con un 31,2 por cientu de los votos (16-14 escaños), los d’Isabel Pérez-Espinosa sumaríen un 29,8 por cientu (15-14) y FAC, un 22,5 por cientu (11-10). Nesta encuesta tampoco faen referencia a los resultaos de los partíos asturianistes.