La quinta edición de ‘Tolo d’Asturies’ lleva música y actividaes pa tolos públicos a Llangréu

Esta fin de selmana Llangréu va vivir la V Muestra Cultural ‘Tolo d’Asturies’, que torna a celebrase na estación d’autobuses. N’Arba, Los Berrones y Xuacu Amieva son dalgunos de los nomes que participen nesta actividá.
 
Pero nun solo hai música nesta muestra cultural qu’entamen el Conceyu de Llangréu y l’Agrupación d’Etnografía y Folclor Reija de Llangréu, en collaboración cola Consejería de Cultura y Turismu. Los asistentes tamién van poder disfrutar d’un mercáu tradicional d’artesanía y gastronomía, una feria del discu y el llibru n’asturianu, talleres pa neños y neñes, y baille tradicional, ente otros.
 
L'actividá va principiar el sábadu, a les 12 hores, con un actu d’apertura nel que va participar la Banda Gaites Conceyu Llangréu. A les 13.30 hores va actuar Jerónimo Granda y, yá de nueche, a partir de les 22 hores, va celebrase un conciertu que va suponer la vuelta de N’Arba a los escenarios. Tamién van compartir escenariu xunto col grupu de folk Héctor Braga y Los Berrones. Mentes, pal domingu, a les 13 hores, va actuar una banda de música y, media hora más tarde, va ser el turnu de l’asturianada.
 
‘Tolo d’Asturies’ va pesllar les sos puertes a les 21 hores, pero enantes tovía va haber tiempu pa presenciar un conciertu homenaxe a la tradición de la pandereta (18 hores), cola actuación de les Pandereteres de Fitoria y Les Filanderes, y pa la música de Xuacu Amieva (19.30 hores).