La Fiscalía pide la llibertá baxo fianza de 150.000 euros pa María Jesús Otero y Marta Renedo

Na mañana d’esti martes, la Fiscalía d’Asturies solicitó la llibertá baxo fianza de 150.000 euros pa María Jesús Otero y Marta Renedo. Dambes permanecen en prisión dende’l 26 de xineru por un casu presuntu de corrupción na Alministración.
 
La Fiscalía presentó un escritu ante'l Xulgáu d'Instrucción númberu dos d'Uviéu pidiendo la posibilidá de que les dos imputaes pudieren quedar en llibertá tres el pagu de 150.000 euros cada una al entender que, anque hasta'l momentu taba xustificada la prisión provisional pa les dos muyeres, nesti momentu nun acuden les circunstancies que llevaron nel so día a solicitar esa midida cautelar; esto ye, un posible tapecimientu de pruebes, la posibilidá de reincidencia y/o la esistencia d'un riesgu de fuga, dau'l momentu en que s'alcuentra la instrucción del casu y les intervenciones realizaes, según l'analís de les pruebes llograes. Xunta a la fianza, la Fiscalía tamién propunxo que s’imponga a Otero y Renedo la obligación de presentase nel Xulgáu los díes 1 y 15 de cada mes, y que se-yos retire'l pasaporte.
 
María Jesús Otero, ex direutora de Planificación, Centros y Infraestructures del Gobiernu d'Asturies, y Marta Renedo, ex xefa de serviciu de la Conseyería d’Alministraciones Públiques, entraron nel mes de xineru en Villabona xunto con José Luis Iglesias Riopedre, ex conseyeru d’Educación y Ciencia, que salió de la cárcel baxo fianza de 100.000 euros el 7 de marzu. Nel casu de les dos muyeres, Otero ta imputada polos delitos de sobornu, tráficu d'influencies, fraudes y exacciones illegales, y negociaciones prohibíes; y Renedo de malversación de caudales públicos, sobornu, fraudes, exacciones illegales y falsificación de documentu públicu.