Cares conocíes apaecen nun vidiu de promoción de la manifestación pola oficialidá del vienres

3 Mayu, 2011 por Redacción

Inicie sesión o rexístrese pa espublizar comentarios

La Xunta pola Defensa de la Llingua Asturiana espublizó’l llunes un vidiu pa convocar a tolos asturianos a la manifestación del vienres pol Día de les Lletres. Nél apaecen l’actriz María Cotiello, Esther Fonseca y Xosé Antón ‘Ambás’.

Esti vienres ta convocada una manifestación n’Uviéu pola oficialidá de la llingua asturiana que tien como mensaxe ‘Da-y al play. Movilízate’. La Xunta pola Defensa de la Llingua Asturiana ellaboró pa ello una spot promocional nel que participen delles cares conocíes. Asina, nél pue vese a l’actriz María Cotiello (Los Protegidos), a la presentador Esther Fonseca y al músicu Xosé Antón ‘Ambás’ animando a los asturianos a movilizase en defensa del idioma.

Nel vidiu promocional, de 23 segundos, estos tres artistes falen a l’asturianu señalando que “quixímoste siempre”, que quieren la llingua oficial “agora” y que tamién la quieren “pal nuesu futuru”. Depués, animen a la xente a ‘Da-y al Play’, lema de la manifestación d’esti añu, que va salir de la Estación del Norte p’acabar nel Teatru Campoamor.