‘Ágora’, d’Anabel Santiago, escoyida meyor canción n’asturianu de los XV Premios de la Música

Na mañana del xueves diéronse a conocer los ganadores de los XV Premios de la Música. Anabel Santiago, col so cantar ‘Ágora’, llevóse'l premiu al meyor cantar n’asturianu al que tamién taben nominaos Corquiéu y Brandal.
 
D’esta forma, Anabel Santiago pon el so nome del palmarés d’esti premiu que yá tien en posesión Manolo Morán, Los Berrones, Rossaleda Jazz Quartet, Tejedor, Esther Fonseca y Dixebra. Pal xuráu d’estos galardones qu’otorga l’Academia de les Artes y les Ciencies de la Música –institución creada pola SGAE y Artistas, Intérpretes y Ejecutantes, Sociedad de Gestión de España (AIE)–, la canción ‘Agora’, del discu del mesmu nome de la cantante de tonada, foi’l meyor de los cantares espublizaos n’asturianu ente’l 1 d’avientu del 2009 y el 20 de payares del 2010. Los otros nominaos yeren los temes ‘Chueve’, de Brandal, y ‘I & C’, de Corquiéu.
 
“Desarrollé tola mio carrera en llingua asturiana, tovía nun reconocida, y ye un valor añadíu al mio trabayu. Creo que los artistes asturianos tamos mui comprometíos cola nuesa llingua y ta mui bien que los Premios de la Música reconozan esti fechu”, señaló Santiago minutos depués de conocer la noticia. “Ser ganadora nunos premios a nivel nacional, que se reconoza’l to trabayu polos tos compañeros de profesión, ye de lo meyor que pue pasate. Ye prestoso amanecer con una noticia como ésta”, añadió la cantante.
 
Santiago va recoyer el so galardón el 18 de mayu nel trescursu d’una gala presentada pol músicu, compositor y productor, Javier Limón, nel Teatro Arteria Coliseum de Madrid. Una gala na que xubirán al escenariu los ganadores de les 28 categoríes nes que se dividen los XV Premios de la Música, ente les que s’atopen los premios a los meyores cantares nes llingües del Estáu distintes al castellanu. Los ganadores d’esti añu foron María del Mar Bonet, con ‘La dansa de la primavera’ (catalán/valencianu); Bide Ertzean, con ‘Don inorrez’ (euskera); y Berrogüeto, con ‘Alalá da noite’ (gallegu).