Llibros y bicicletes xúnense’l sábadu n’Avilés pa celebrar el Día del Llibru

Avilés va vivir el sábadu una esperiencia novedosa pa celebrar el Día del Llibru, qu’esti añu se retrasó a esta selmana al cayer en festivu. Dellos coleutivos van promocionar al mesmu tiempu la llectura y l’usu de la bicicleta como mediu de tresporte.
 
Ciclistes urbanos d’Avilés y los coleutivos BookCrossing Asturies y Asturies ConBici entamen ‘Qué rueden los llibros’, actividá que consiste nun paséu en bicicleta pela ciudá dende la Casa Conceyu al parque Les Meanes. Ellí, alredor de les 19 hores, los asistentes van lliberar llibros, esto ye, dexar exemplares en llugares públicos pa qu’otres persones puedan recoyelos y sustituyilos por otros que yá lleeren. Enantes de facer esta aición, ye necesario rexistrar el llibru na web de BookCrossing pa conseguir un númberu d’identificación.
 
La intención d’estos coleutivos col ‘Qué rueden los llibros’ ye “fomentar l’usu de la bici, favorecer actitúes y conductes de solidaridá y compartir cultura”. Na actividá, na que de xuru va haber munchos llibros n’asturianu, pueden participar toles persones que quieran, ensin importar la edá. Nun ye obligatorio llevar un llibru, anque sí importante pa vivir l’espíritu de l'actividá.