La Vuelta a Asturies principia n’Uviéu con Santi Pérez como favoritu

Una etapa ente Uviéu y Xixón va abrir la LV Vuelta a Asturies, que tien como novedá principal el cambiu del color del maillot de llíder pa pasar a ser azul y mariellu. Santi Pérez ye’l favoritu pa ganar una ronda qu’esti añu incopora la Xuba al Naranco.
 
Un total de 117 corredores de 15 equipos van salir del Palaciu de los Deportes d’Uviéu a les 12.35 hores pa percorrer la primer etapa de la Vuelta Asturies, una ruta de 162,2 quilómetros que va finar na avenía Rufo Rendueles de Xixón, onde los ciclistes llegarán a les 16.31 nel meyor horariu previstu. Los corredores van encontrase nesta etapa con dos puertos de segunda categoría, El Fitu y l’Altu Samartín de Güerces, ésti últimu a namái a 14,3 quilómetros de la meta.
 
El moscón Santi Pérez (Barbot Efapel) ye’l candidatu principal pa llevase la ronda asturiana, anque tendrá una competencia dura en ciclistes como’l cangués Luis Pasamontes (Movistar) y el so compañeru d’equipu José Iván Gutiérrez, los corredores del Caja Rural, Iñigo Cuesta y Joaquín Sobrino. Los cinco van pelear por llegar al Naranco’l llunes vestíos colos colores azul y mariellu del maillot de llíder de la Vuelta a Asturies, novedá principal de la edición d’esti añu xunto cola incorporación del XLV Xuba al Naranco a la ronda. La negativa de Llanes d’acoyer el so final d’etapa tradicional por mor de la crisis económica llevó a los organizadores a tomar esta decisión pa contar con una Vuelta de cinco etapes y non reducila a cuatro.
 
La ronda asturiana va continuar mañana con una etapa de dos sectores: Xixón-Avilés, pela mañana, y una crono individual de 14 quilómetros en Piedras Blancas, pela tarde. Pal sábadu, la Vuelta va facer un percorríu ente Ḷḷuarca y L’Acebu, y al día siguiente, ente les instalaciones de Cafés Toscaf y Uviéu. La competición ciclista va terminar el llunes cola Xuba al Naranco.