Bloque-UNA reclama un 8 de setiembre “que valga d’escaparate a la riqueza musical d’Asturies”

Bloque por Asturies-UNA presentó esti miércoles les sos propuestes en material musical. Reclama un 8 de setiembre “que valga d’escaparate a la riqueza musical d’Asturies” y la creación d’una entidá alternativa a la SGAE, ente otres.
 
Xicu Ariza, responsable del programa musical del Bloque por Asturies-Unidá Nacionalista Asturiana (UNA) y ex redautor d’ASTURIES.COM, y Rafael Palacios, candidatu de la coalición a la Xunta Xeneral, fixeron públiques les sos propuestes en materia musical, entes les que destaquen l’apoyu a un 8 de setiembre con presencia de grupos asturianos. Nesi sen, Bloque-UNA reclama que los actos del Día de la Nación Asturiana se tornen “nun festival cultural dignu, curiosu, plural, y que valga d'escaparate de la riqueza musical y de la identidá d'Asturies”, depués d’unes ediciones últimes onde s’incluyeron pocos artistes del país.
 
La coalición tamién mostróse crítica cola cola xestión musical del Gobiernu d’Asturies y refugó decisiones ablucantes como la non celebración del añu d’Asturies nel Festival Interceltique d’An Oriant/Lorient, amás de llamentar la marcha del festival Derrrame Rock a Ourense. Ariza quixo incidir en que la organización muestra'l so compromisu “con tola música fecha n'Asturies, ensin tener en cuenta l’estilu y llingua utilizaes, y non sólo cola que se fai n'asturianu”.
 
Bloque-UNA tamién propón nel so programa eleutoral, ente otres midíes, la creación d’una entidá de calter públicu alternativa a la Sociedá Xeneral d'Autores y Editores (SGAE) pa la xestión de los derechos d'autor. La formación xustificóse na postura “abusiva y monopolística” qu'al so entender tien el venir de la firma que dirixe Tedy Bautista. Ariza destacó esta propuesta p'algamar “una xestión de derechos llibre, democrática y pública”. Asina, recordó que la SGAE llogró nel 2010, 348 millones d'euros en beneficios, un 5,8 por cientu más que nel 2008, y entrugó “¿a ónde va esi dineru?”.
 
Palacios esplicó que Bloque-UNA va proponer “en toles instituciones nes que llogre representación política una declaración pública contra la SGAE”. Na mesma, plantegará crear la nueva entidá de derechos. “Queremos que s'abra esi debate”, apuntó Ariza. El cabezaleru de la coalición consideró que ye posible cambiar la llexislación pa crear esta nueva figura d'ámbitu asturianu “con una xestión tresparente, con tarifes democrátiques y que los sos beneficios repercutan nel apoyu a la música y a la cultura feches n'Asturies, en llugar de nel arriquecimientu d'una casta política ya intelectual”.
 
El resto de propuestes en material musical de los nacionalistes son “l'habilitación de llocales d'ensayu y la creación d'una programación d'actuaciones de tou tipu baxo xestión pública, la mayor presencia de la música asturiana na RTPA, la recuperación de l'Axenda Musical Asturiana o la creación d'un sellu de calidá de la música d'Asturies”. Por último, Ariza, tamién componente del grupu Fala non Caduca y responsable del portal d’información musical Fnast.net, destacó la gran cantidá de músicos que van nes llistes de la coalición pa les eleiciones del 22 de mayu, ente los que citó a David Suárez 'Cai' (La Coḷḷa Propinde), Xabel Vegas, Miguel Fernandi 'Burilo' (Skama la Rede), Xosé Antón Fernández 'Ambás' o Xune Elipe (Dixebra).