Dellos músicos asturianos van participar nun conciertu solidariu’l xueves nel Filarmónica

Delagua, Dark la Eme, Pablo Moro y TrueQuedart son dalgunos de los artistes que van participar nun conciertu solidariu a favor de los neños del Congu. Ésti va celebrase’l xueves, a les 20 hores, nel Teatru Filarmónica d’Uviéu.
 
La Fundación El Pájaro Azul entama esti conciertu que tien como oxetivu recaudar perres pa una de les iniciatives d’esta institución: la merca d’alimentos pal Centru Bana ya Poveda de Kinshasa, la capital de la República Democrática del Congu, onde viven 40 críos en situación de marxinación y vulnerabilidá psicosocial y sanitaria. La entrada pa presenciar les actuaciones ye de seis euros y “un euru da pa comprar la comida d’un neñu del Congu”, apunten dende la Fundación. Polo tanto, por cada entrada que se pueda vender, “un neñu va comer per seis díes”. De cumplise les previsiones de públicu, los pequeños del Centru van tener arroz, maíz y azucre suficiente pa cuatro meses.
 
El llistáu d’artistes que van participar nel conciertu solidariu ta formáu por Pablo Moro, Holy Mule, Delagua, Dark la Eme, Verde Cannaia, Carás, GPS Project, Los Fakires de Fitoria, TrueQuedart, Fenoy y Vaudi&Gas. Les entraes yá tan a la venta nos caxeros Caxastur Tiquexpress o na web d’esti serviciu.