Xega acusa a Salú de negar la reproducción asistida a toles muyeres que nun vayan con homes

La polémica pola negativa de Salú a da-y tratamientu pa ser madre a una lesbiana llevó a la conseyería a facilitalo namái a aquelles que vayan acompañaes d’un home con problemes de fertilidá. Xega desveló esta decisión supuesta de Salú.
 
El coleutivu que representa a les lesbianes, gais, transexuales y bisexuales d’Asturies, celebró ayeri una rueda de prensa na que tuvo presente Silvia García, vocal del Área de Lesbiana y miembru de la xunta direutiva de l’asociación, nel que contó’l so casu personal –ye la segunda muyer lesbiana a la que Salú deniega-y tratamientu pa ser madre– y acusó a la conseyería de nun dalo a muyeres que vayan soles, yá sían lesbianes o heterosexuales. Según narró l’afectada, el 18 d’abril acudió a una cita na Unidá de Reproducción Asistida tres realizar toles pruebas médices necesaries, pero, una vez allí, el xefe del Serviciu treslladó-y de forma verbal la “orde” recibida de la Conseyería de Salú y Servicios Sanitarios “de nun volver a almitir a nenguna lesbiana, nin a muyeres soles”.
 
García añadió que’l xefe de seición comentó-y que recibiera esa instrucción nuna reunión que mantuvo con responsables de la conseyería, en concreto Amalio Alonso y Joaquín Arcadio Martínez. “Siéntome violada y humildada”, añadió l’afectada, pa quien la negativa a da-y tratamientu “ataca de forma frontal” la so decisión llibre y supón una discriminación clara. Inclusive, considera que lo que tán recomendando-y dende Salú ye que busque pela so cuenta a un home pa tener relaciones. García considera esto inconcebible porque amás sería dalgo con importantes “riesgos xurídicos y sanitarios”.
 
Mentes, Mané Fernández, coordinador de Xega, afirmó que’l so coleutivo sigue estudiando la posibilidá de plantegar una denuncia “por prevaricación presunta pola discriminación por razón d’orientación sexual y en defensa de toles muyeres ensin pareya masculina”.