Bloque-UNA comprométese a destinar el 0,7 por cientu del PIB a cooperación al desarrollu

La coalición Bloque-UNA va destinar el 0,7 por cientu del PIB d’Asturies y de los conceyos a la cooperación al desarrollu. El so candidatu, Rafael Palacios, fixo públicu esti llunes diez compromisos de la formación en materia de solidaridá.
 
D’esta forma, Bloque por Asturies-Unidá Nacionalista Asturiana apuesta por destinar esi porcentaxe a cooperación, solidaridá internacional y defensa de los derechos humanos “permitiendo coordinación máxima ente les instituciones asturianes” nesi sen, afirmó Palacios en rueda de prensa. Amás, dende la coalición plantegó una reducción añal del 1 por cientu pa disvialo a “inversión social urxente, tanto en sanidá como en polítiques sociales y proyeutos pa reducir les causas estructurales de la violencia y de la guerra”. Amás, esixe la retirada de los soldaos españoles de les zones de conflictu onde tean presentes.
 
Otros compromisos son la mengua de relaciones comerciales con “empreses y países que nun respeten los derechos humanos o que sían parte de conflictos armaos”, ente los que Palacios señaló a Marruecos, Israel o Arabia Saudita, y de les subvenciones a entidaes que “vulneren los derechos de los trabayadores o los derechos humanos”. Tamién ta la incorporación de “materies específiques y tresversales como la educación en Derechos Humanos, la educación pal desarrollu y la defensa de la paz” nos estudios de los escolinos.
 
Por último, el candidatu de Bloque-UNA propón l’establecimientu de tases sobre les transacciones financieres; la llucha contra’l fraude y la destinación de los fondos recuperaos a políticas sociales; o l’apoyu a la inversión económica social, reflexada n’actividaes como “el comerciu xustu o la banca ética”.