Delles candidatures, refugaes por tar presentaes n’asturianu

El Bloque por Asturies-UNA y Conceyu Abiertu vieron como les sos candidatures foron refugaes pola Xunta Eleutoral de la zona de Llaviana por tar n’asturianu. Nel resto d’Asturies, tramitáronse ensin problema.
 
La sentencia del 48/2000 de 24 de febrero del Tribunal Constitucional, tres una reclamación d’Andecha Astur, permite l’usu del asturianu nes candidatures eleutorales, polo que s’espera que les de les dos formaciones nacionalistes pa Llangréu y Samartín del Rei Aurelio que foron refugaes la selmana pasada pola Xunta Eleutoral de la zona de Llaviana sían confirmaes esti llunes, día nel que se van dar a conocer les llistes definitives que van dir a les urnes el 22 de mayu. El motivu alegáu pola Xunta Eleutoral yera que al presentales “nun s’utiliza nenguna de les llingües oficiales del Estáu español”.
 
“Tamos mui tranquilos porque les candidatures de nueso aceptáronles nel resto de xuntas locales y nes tres circunscripciones por Asturies, amás d’esistir una sentencia del Tribunal Constitucional", afirmó Rafael Palacios, candidatu del Bloque por Asturies-Unidá Nacionalista Asturiana (UNA) a la Xunta Xeneral. Sicasí, consideró “denunciable que nel sieglu XXI, nun país nomáu democráticu, siga reprimiéndose la llingua asturiana, o nun se reconoza una candidatura por tar escrita n’asturianu”.
 
Mentes, Conceyu Abiertu tamién denunció la situación y mostró la so tranquilidá pola esistencia de la sentencia del Tribunal Constitucional. Por ello, confía en que güei les sos candidatures sigan alantre.