La Xunta y AXA promueven una iniciativa pa dirixise al gobiernu español y al Conseyu d'Europa

Entrambes organizaciones dieron anuncia de la robla d'un alcuerdu de collaboración pa la defensa de los derechos llingüísticos que va tener como primer puntu la interlocución col Gobiernu español, col apoyu d'organizaciones qu'axunten a falantes d'asturianu.

Nuna rueda de prensa conxunta celebrada ayeri pela tarde, Llucia Menéndez y Paula Cristobal en representación de la XDLLA y Xurde Blanco y Xosé María Estrada Janáriz pol AXA dieron anuncia del entamu d'una collaboración ente dambes organizaciones, que va concretase nuna campaña que ye “una consecuencia directa del Informe del Comité d'Espertos del Conseyu d'Europa que recomendaba al gobiernu español l'apertura d'un diálogu colos falantes d'asturianu pa meyorar l'estatus llegal del idioma.  Siguiendo esta recomendación, dende AXA y XDLLA va promovese dende güei una iniciativa empobinada a recoyer apoyos ente'l texíu asociativu asturianu rellacionáu cola llingua p'articular la interlocución de la comunidá de falantes de llingua asturiana col estáu español y col propiu Conseyu d'Europa, y trabayar asina de forma organizada pola meyora del nivel de reconocimientu llegal de la llingua asturiana, como recomienda'l propiu Conseyu d'Europa”.
 
Según informaron los representantes d'AXA esta iniciativa va tener como oxetivu concretu "aperiar un conceyu d'organizaciones de falantes de la llingua asturiana dende'l que se va ufiertar al gogiernu español la collaboración desixida pol Conseyu d'Europa pa examinar les posibilidades de protección de la llingua". Pa ello va entamase darréu una recoyida de firmes.   

Ye intención de la XDLLA y del Aconceyamientu de Xuristes pol Asturianu “afitar un mecanismu útil qu'informe regularmente a tolos organismos públicos competentes en materia llingüística, especialmente los rellacionaos cola Carta Europea de les Llingües Minoritaries, sobre la situación de marxinalidá llegal y indefensión que carez la llingua asturiana y les persones que la falen, asina como sobre l'incumplimientu n'Asturies del marcu llegal afitáu pol Conseyu d'Europa y pol Estáu Español pa la protección de les llingües minoritaries”.

Asimesmo encamienten “a los parlamentos español y asturianu l’esclarecimientu de los fechos y l’esenmazcaramientu de les persones responsables de la intolerable vergüenza institucional de mentir énte’l Conseyu d’Europa pa xustificar el tratu discriminatoriu que carez la llingua asturiana”.