Ḷḷena convoca la VI Amuesa de Teatru Local ‘¿Mires o actúes?’

L’Área de Mocedá del Conciyu de Ḷḷena ta acabante d’espublizar les bases de la VI Amuesa de Teatru Local ‘¿Mires o actúes?’. Nél pueden participar los mozos y moces de tolos colexos, institutos, grupos o asociaciones del conceyu.
 
Esta iniciativa, sofitada pol Institutu Asturianu de la Mocedá, tien l’oxetivu de “fomentar nos alumnos capacidaes básiques como la observación, la creatividá, la sociabilidá, la responsabilidá, el trabayu n’equipu y la autoestima”, amás de “ayudar a meyorar la convivencia y cohesión de la vida escolar y social”, señalen dende l’Área de Mocedá, qu’encabeza’l conceyal de Cultura y Política Llingüística, David Suárez. Les bases de l’Amuesa de Teatru acepten una obra por cada centru escolar, grupu o asociación, col requisitu de que toes cuenten con un adultu responsable del grupu teatral.
 
Los interesaos en participar deben remitir una solicitú a la direición del Espaciu Mozu ‘Juvelena’ (Cai Ramón y Cajal s/n, 33630 La Pola Ḷḷena) acompañada de ‘una historia del grupu de teatru –si la tuviere–, datos sobre’l mesmu –si ye estable o non, un taller, etc.–, un llistáu de los actores y actrices colos sos datos personales y los cursos onde tean matriculaos, el títulu de la obra, los oxetivos educativos que persigue y una síntesis argumental. Tamién ye necesario información sobre’l repartu de la obra, carauterístiques del montaxe y duración, amás d’un cartelu fechu polos mozos y moces. Les solicitúes han de presentase, como mínimo, un mes antes de la fecha de representación de la obra.
 
Toles entidaes que presente al so grupu de teatru al ‘¿Mires o actúes?’ van recibir 500 euros pa los gastos de la puesta n’escena, amás d’un diploma acreditativu, y van poder representar la so creación nel Teatru Vital Aza utilizando tolos sos medios téunicos. Dende la organización recuerden que l’Amuesa nun ye una competición y que lo que se pretende con ella ye “averar el mundu del teatru a la mocedá y la población de Ḷḷena en xeneral”.