El Serviciu de Normalización del Cabu Peñes espón les sos campañes pa esparder l’asturianu

El Centru Polivalente La Baragaña, de Candás, ye la sede d’una esposición entamada pol Serviciu de Normalización Llingüística de la Mancomunidá del Cabu Peñes colos materiales de les sos campañes. Ésta va tar abierta’l públicu hasta’l 8 de mayu.
 
Les persones que s’averen a La Baragaña van poder conocer de primer mano toles campañes que tien en marcha’l Serviciu de Normalización Llingüística de la zona en collaboración cola Rede de Normalización Llingüística nos Conceyos y la Conseyería de Cultura y Turismu. Asina, na muestra van contemplase los materiales de ‘Na igualdá, tas que ruempes’ y ‘Na igualdá, nun quedes fuera xuegu’; de la campaña medioambiental ‘Echándo-y una mano al mundu’; ‘La sidra, d’Asturies’; y ‘Les xornaes gastronómiques del fariñón y la fariñona’, pa promocionar estos productos típicos de la zona.
 
“Estes campañes tienen como enfotu la recuperación, conservación y promoción del asturianu, esto ye, la normalización social de la llingua asturiana. Y ye que ye sabío que l’usu de la llingua autóctona en tou tipu  d’actividaes xenera un texíu de producción económica y cultural al rodiu d’esti tipu campañes qu’anguaño se caltienen con gran puxu y  tán algamando un grau madurez bien importante”, señalen dendel Serviciu de Normalización. Los materiales de toes estes campañes yá tán repartiéndose nos ámbitos a los que tán dirixíes, con esceición del de les xornaes gastronómiques, que van distribuyise en setiembre, fecha na que se consume’l fariñón y la fariñona.
 
Amás de la muestra en sí, los visitantes a la esposición tamién van atopar información sobre subvenciones y cursos, ente los que destaca ún entamáu pola Academia de la Llingua Asturiana, en collaboración col Serviciu, que ta orientáu a l’alfabetización d’adultos n’asturianu. Ésti va principiar pa setiembre.