Dixebra va participar nes XVIII Chornadas d'as Lenguas d’Aragón

Zaragoza acueye dende’l llunes pasáu les XVIII Chornadas d'as Lenguas d’Aragón, actividá que va pesllar el sábadu Dixebra con un conciertu. La banda llocal de rock n’aragonés Prau va acompañar a los asturianos n’actuación.
 
La sala López de Zaragoza ye’l llugar onde va celebrase esti conciertu, el segundu de la xira ‘Bailla la crisis’ que va llevar a los asturianos per tol Estáu nesti 2011. La entrada pal conciertu, el segundu na carrera de Dixebra en Zaragoza –yá tocaren hai tiempu nun evento col títulu ‘L'aragonés en a carrera’–, tien un preciu de 10 euros. D’esta forma, el grupu avilesín va zarrar les Chornadas d'as Lenguas d’Aragón, actividá entamada pola Asoziazión Nogará-Religada que cuenta con conferencies, charres y un conciertu.
 
Nesta decimoctava edición, les Chornadas trataron sobre la situación de les llingües d’Aragón –aragonés, catalán y castellanu–; la historia del aragonés en Zaragoza, con visita a dellos puntos de la ciudá onde tovía se mantienen nomes nel idioma llocal; y sobre los neofalantes y l’enseñu, actividá pa la que foi convidada AEK, coordinadora vasca que se dedica a la enseñanza del euskera a xente adulto. Esti vienres ta prevista una charra sobre les esperiencies nel usu del aragonés y del catalán en dellos medios de comunicación y, pal sábadu, una clase d’aragonés na cai. Yá de nueche, va ser el turnu del conciertu de Prau y Dixebra.
 
Ye importante destacar l’actividá que’l coleutivu Nogará ta faciendo en defensa del aragonés, una llingua que, al igual que l’asturianu, nun cuenta col estatus llegal de cooficialidá nel so territoriu. Ente les sos xeres, amás de la celebración de les Chornadas, destaca la publicación de la revista ‘O Espiello’ y la organización de conciertos, cursos y charres, ente otres coses.