Tuenda actúa esti xueves n’Uviéu pa presentar el so tercer trabayu

L’Auditoriu Príncipe Felipe d’Uviéu va acoyer esti xueves el conciertu de presentación del tercer trabayu de Tuenda, que lleva’l nome de ‘Tuenda 3’. L’actuación va principiar a les 20 hores y va tener delles sorpreses.
 
El tríu compuestu por Xosé Ambás, Pepín de Muñalén y Elías García asoleya esti tercer discu que sigue la mesma llinia de los dos anteriores. D’esta forma, el grupu continúa interpretando cantares recuperaos por Ambás a lo llargo de tola xeografía del país respetando les sos melodíes y estructures. ‘Tuenda 3’ tamién va siguir contando con temes cantaos en delles variantes llingüístiques del asturianu. Asina, nesta ocasión, Ambás va interpretar per primer vez con Tuenda cantares de Colunga, Quirós, Teberga o Ponga.
 
Hai que destacar que nel conciertu de presentación d’esta tarde, que tien un preciu de 5 euros, tamién va haber trés temes acompañaos con baille, puesto que’l tríu tien interés el que’l so repertoriu sía baillable. Otra manera, Tuenda tien confirmada otra fecha nueva’l 25 de xunu nel Muséu del Pueblu d’Asturies.