Miles de persones salieron a la cai en Llangréu pa pidir trabayu nes cuenques mineres

Unes 6.000 persones, según la organización –3.000 pa la Policía Llocal de Llangréu–, marcharon de La Felguera a Sama pa pidir emplegu nes cuenques mineres. Convocaron la protesta les delegaciones de Comisiones Obreres nel Nalón y nel Caudal.
 
La manifestación, que tenía’l lema ‘Pol emplegu nes cuenques mineres’, salió a les 19 hores del parque Dolores Fernández Duro de La Felguera y fixo un percorríu pel llugar hasta llegar al parque Doráu de Sama. Los 14.000 paraos qu’hai nel Nalón y nel Caudal y los 27.000 habitantes que perdió la zona nos 20 años últimos foron motivu suficiente p’axuntar a miles de persones en Llangréu reclamando un futuru meyor pa les cuenques.
 
José Manuel Zapico, secretariu de Comisiones Obreres (CC OO) nel Nalón agradeció la respuesta de la xente qu’acudió a la llamada del sindicatu –tamién tuvo pallabres de recuerdu pa Nel Amaro– y llamó a actuar rápido pa parar el declive actual de les cuenques. Tamién reclamó un cambiu de xestión de los fondos mineros y qu’éstos se dedicaran a la creación d’emplegu y non a proyeutos d’infraestructures como’l tren-tran del Nalón. Mentes, Alfonso de la Rosa, secretariu de CC OO nel Caudal, destacó’l carauter reivindicativu de la manifestación y alvirtió de que nun van permitir que más xente mozo abandone les cuenques por falta d’oportunidaes. Nel actu final de la protesta tamién intervino Antonio Pino, secretariu de CO OO n’Asturies, que fixo referencia a la ausencia na manifestación d’UXT, anque aseguró qu’ello nun diba frayar la unidá d’aición, que consideró más necesaria que nunca.
 
Quién si tuvo presente na manifestación foron el Bloque por Asturies, el PC de Llangréu y Foro Asturias Ciudadano, anque los militantes d’esti partíu últimu colaron cuando sonaron les notes de ‘La Internacional’ per megafonía. L’únicu alcalde de les dos cuenques que participó na protesta foi’l de Casu, Elías Rodríguez Lozano, que tuvo acompañáu del so compañeru de partíu y candidatu d’Izquierda Xunida a les eleiciones, Jesús Iglesias, formación que tamién sofitó la convocatoria. Comités d’empreses de factoríes con conflictos llaborales como Venturo XXI o Alas Aluminium, asociaciones vecinales y dellos coleutivos sociales tamién acudieron a la convocatoria de CO OO.