Una manifestación va percorrer esti miércoles Llangréu pa reclamar emplegu nes cuenques

Comisiones Obreres del Nalón y del Caudal convocaron pa esti miércoles, a les 19 hores, una manifestación baxo’l lema ‘Pol emplegu nes cuenques mineres’. Bloque por Asturies sofita esta protesta, la tercera col mesmu oxetivu n’añu y mediu.
 
Nesta ocasión, CO OO entama la protesta en solitariu, yá qu’UXT, en pallabres de Alfonso de la Rosa, secretariu de Comisiones nel Caudal, nun considera qu’ésti sía un momentu oportunu pa la manifestación. Nes cuenques mineres asturianes hai agora 14.000 paraos, cifra importante pese a la perda de población na zona, n’especial de xente mozo.
 
Los convocantes tamién denuncien la situación que sufren dalgunes empreses como Venturo XXI, Alas Aluminium o Diasa, ente otres, puestes nel so día como exemplu de reactivación económica de les cuenques y que güei tienen munchos problemes llaborales o tán pesllaes. Por ello, CO OO solicita la participación de la población de la zona nesta manifestación que va salir del parque de Dolores Fernández Duro, en La Felguera, y va acabar nel parque Doráu de Sama.
 
Otra manera, Bloque por Asturies asoleyó esti martes un comunicáu nel que llama a los sos afiliaos y simpatizantes a participar na protesta convocada por CO OO. “La situación de munches de les empreses –Venturo XXI, Alas Aluminium, los talleres de Duro Felguera, Diasa y subcontrates mineres– de les nueses cuenques tán destinaes al pieslle por una xestión pésima de los sos empresarios, de los que ye cómpliz el Gobierno asturianu”, señaló Rafael Palacios, voceru de la formación nacionalista, que tamién fai referencia a “la ofensiva que llanzaron sobre los derechos de los trabayadores tanto’l Gobiernu español como l’asturianu”, el futuru del carbón y l’usu que se fixo de los fondos mineros. Por ello, Palacios considera “obligao, por parte de los seutores populares, ofrecer respuestes contundentes a tantes agresiones”.