Asturies ye’l país onde más medró’l reciclaxe de vidru, anque tovía ta lloñe de los territorios llíderes

Con un incrementu del 6,8 por cientu, Asturies convirtióse nel país onde más medró’l reciclaxe de vidriu. Ello supón que cada asturianu recicla 14,6 quilogramos al añu, lloñe tovía de los 27 quilos de los baleares.
 
La recoyida seleutiva d’envases de vidru algamó los 15.816.790 quilogramos n’Asturies nel 2010, lo que supón alrededor de 1.001 tonelaes más qu’en 2009, según informó’l Consorciu pa la Xestión de los Residuos Sólidos n’Asturies (Coxersa). De esta forma, con una medra del 6,8 por cientu, Asturies convirtióse nel país onde más s’incrementó la separación d’esti restu. Tres Asturies tán Andalucía y Murcia, con una xuba del 4 por cientu; y Illes Balears, con un 3,6 por cientu.
 
Estes cifres señalen que cada asturianu recicló nel 2010 una media de 14,6 quilogramos de residuos d’envases de vidru, cerca d’ún quilo más que l’añu anterior, cuando la ratio situóse en 13,7 quilos por habitante. Pese a esti incrementu, Asturies tovía ta lloñe de los territorios punteros nel reciclaxe del vidru, que tien a les Islles Balears como esponente máximu colos 27 quilos reciclaos por habitante nel 2010, y mantiénse perbaxo de la media estatal, que ta situada en 15,1 quilos. Nel índiz de sensibilización ciudadana, a los baleares siguen-yos los navarros (25,4 quilos) y los vascos (25,3 quilos).
 
Según confirmó Coxersa, Asturies cuenta con 3.643 contenedores verdes, lo qu’equival a ún por cada 250 habitantes, anque nestos datos nun se tien en cuenta la población d’Uviéu, ciudá onde la recoyida de basoria faese de puerta a puerta.